هوا هوا والصدر مركاض الجياد الصافنات
 

هوا هوا والصدر مركاض الجياد الصافنات
‏كيف اتنفس والغبار اجتاحني واعمى يدي

‏وانا بقايا اطلال تربكها رياح الذكريات
‏اطرد سراب شعوري الموزون والشعر يعدي

‏مالاح براق القصيد العذب رغم المعطيات
‏والشعر زفرة جود والاقلام ما فيها اجودي

‏مدري متى اشتت جموع الحزن والمّ الشتات
‏واسقي الصدر من مزنة الواقع ويخضرّ سعدي

‏وليت الخيال اللي يورّيني ربيع الامنيات
‏وراني اوراق الخريف اللي على اغصان جهدي

‏محتاج احجّم من طموحاتي وتبقى الذات ذات
‏وعلى بساط الريح محتاج البساط الاحمدي

‏يا نخلة الوادي مكانك بين دجله والفرات
‏وانتي رحلتي في لهيب القيظ تبغين بردي

‏على ايش نتغرّب ويتشرد وطن من تضحيات
‏ونرسم نهايات الغلا الجامح قبل لا يبتدي

انا بلدك اللي يحبك موت ويموتك حياة
‏وانتي على ذمة تفاصيل التفاصيل بلدي

‏اعاتبك ولاّ اسقطك فـ الدمعتين الغاليات
‏ولاّ انتظر ولاّ احتظر ولاّ اجرحك ولاّ اهتدي

‏وشلون بـ احرر عيوني من حبال المغريات
‏يا الذاكره حنّي عليه يا الهواجيس ارقدي

‏من ليلة الفرقا وانا محتار واحلامي فتات
‏واقف على حدّ المتاهه بين قبلي وبعدي

‏اخاف لا اقسى وانزعك واموت ويقولون مات
‏واخاف لا اعوّل على احلامي واطيح بـ مفردي
‏
‏تمتعي في نعمة النسيان يا ست البنات
‏ومما عطاك الله عطيني ما ينسّيني غدي

‏تعبت اشوف عيونك الثنتين فـ الاربع جهات
‏واسامر القمرا وهي تضحك على دمع الجدي

‏ذكراك لا مرّت يذوب الليل و يطير السبات
‏وينام نومي والوساده تشرب دموع سهدي

‏الشوق يدفعني والمّ الورد باقة أغنيات
‏والصد يمنعني لا اريق الوجه بالكف الندي

‏لاززلت واقف مع عقارب ساعتي وانزف شمات
‏والانتظار بكل يوم يحج *ويقدم فدي

‏لا قهوتي قهوه ولا انفاسك بها سكر نبات
‏ما غير اسولف لـ الصباح اشلون الانسان يغدي

‏امّا تعالي واقهر الحظ الردي واقول جات
‏ولا ارحلي مني وانا اتفاهم مع الحظ الردي


مبارك بن هديان