بنت مروين الأسنّة جلاليب الأجل
 

‏بنت مروين الأسنّة جلاليب الأجل
‏يوم للموت اصطفاقة وللحدب ألسنة

‏ردي السود المظلّة عن الخرس النجل
‏خلّي الشاعر يهجرس من الشعر أحسنه

‏فيك شي من الغواية وشي من الخجل
‏للقلوب الجاحدة والقلوب المومنة

‏لاقيٍ بك ما لقى السامريّ مْن العجل
‏فتنةٍ تجرح يقين النفوس الديّنة

‏لو تمرين العما الأصقه العيّ ارتجل
‏كيف باللي به من القاف حمّى مزمنة
‏
‏في طرف سيفك زمام وطرف عاجك حجل
‏أما أنا فيني من الشوق شعر وشيطنة

‏تقعد عيون القصايد رجل على رجل
‏كل ما خليتها في بهاك مزيّنة

‏قلتي أنت تحبّني من ضمير و قلت أجل؟
‏غيرك أصلاً ميّت القلب منهو يفتنه!

‏أتركينا نلتهي في محبتنا لأجل
‏ما يغافلنا الزمن والزمن ما نضمنه

‏عاد لا جا بيننا بعد ضحكتنا وجل
‏ الهوى من يوم ماكان هذا ديدنه

‏أنتي إنثى عالميّة وأنا رَجل رَجل
‏والمقاشر بيننا مْن الأمور الممكنة

‏ازعلي وإن طوّل رضاك أنا ماني عَجل
‏يوم ولّا اسبوع ولّا شهر ولّا سنة

‏واخذي اللي جاك منّي يحاضيه السجل
‏ واتركي باقي القصايد تراها دندنة

‏الله اللي لمنا مع بعض عزَّ وجَل
‏مستحيل إنه جمعنا لقصة محزنة


سلطان الحوالي