فوق هام السحب ( الشعر الشعبي) على متن القوافي

الناس يأبن النـاس فيهـــم وفيهــم
بعطيـك عنهــم ما يكفيــك عنهــم

حاول تحب اللي ما شاء الله عليهم
و تخلـي اللــي اعوذ بالله منهـم

......

الناس مثل البن والوقت محماس
‏ومن تحتهم نار السنين العجافي

‏نوع ليا ذقته يكييف لك الراس
‏ونوع عسى ربي يديم العوافي
‏

......

يالله سـألـتـك يـا غـفـور ويـا رحـيـم
تغفر ذنـوب اللي رجـا عـفـوك وتـاب

أنت اللطيف انت الحليم انت الكريم
واللي عـصـاك وتـاب تجـزاه الثـواب

وانت المحيط الواحد الفرد العـلـيم
ما خاب من لك يا عظيم الشان اناب

......

‏يمّه .. على سمْح الليالي كبرنا
‏والجار كانت خشرته عيش وثياب

‏ما عاد يلحقنا القمر في سفرنا
‏والغيم لا يبكي ولا يمطر أحباب

‏والريح لا قامت تصلّي بشجرنا
‏ما فززّت ليل النواعس والأبواب

‏والدمعة اللي سيّرت في سهرنا
‏اليوم يمّه حثربت بين الأهداب

....

يا ليلٍ تقلط في عيوني سهر وإسهاد
متى أشوفك تقلط سكون وطمأنينه ؟

الإنسان مهما كان روتينه المعتاد
يكدر عليه أحيان تكرار روتينه

وداع النهار موادع اللي خرج لإجهاد
لا طاح الشفق طيحة عباير محبينه

شعوري وأنا أرفع للفجر صرخة إستنجاد
شعور الصويب اللي فقد نجدة يمينه

هنيي لو أني طير يجوب كل بلاد
تقطع بها أفاق الخضيرا جناحينه

حنين المحب يعيشه طرقة الكداد
لا سافر ترده لهفة الشوق من يحينه

هذا قلبي المنقاد يالعارض المنقاد
لو أنه يعريك فرق حجمه وتكوينه

أمرك وأنا مستبعد فكرة المعواد
ويغلب علي وجه الشبه بينك وبينه

ياغاية مراد اللي يشوفك أحق مراد
والأحق في بسمة شفاته وماء عينه

ملكني غرامك لين صرت أملك إستعداد
أناصر ضحايا الحب، وأفهم مجانينه

أدور لجرحك من يدين الطبيب ضماد
وأثر مايضمد جرحك الا سكاكينه

أنا قبل أعرفك كان قلبي عيوف وصاد
وبعدك ماصرت أعرف غير الله يعينه

لكن الله اللي مكنك والله اللي راد
تخلينه يحب الحياه .. وتخلينه

......

حادي الصمت ماعندي لصمتي بديل
وأنت ليله تغافلها الجفا مادرت

وين أوديك ياهمٍ بقلبي ثقيل ؟
جعل تسري بك الليله ليا من سرت

أيه خايف على دمعة عيوني تسيل
ماقدرت أتجاهلها وهي ما أقدرت

كانت أصعب على نفسي من المستحيل
لين سالت على شان الغلا وأعبرت

عزتي تطلب الفرقا بيوم الرحيل
لو جروحي على طول العمر مابرت

جيت عابر سبيل ورحت عابر سبيل
والمحبه ربت في داخلي وأكبرت

أنت ياللي ليا مالت جروحك تميل
الليالي خذت مني وماقصرّت !

لا تسولف ترا ليل المفارق طويل
كل كلمه على بالك فبالي طرت

شوف عيني وتلقى للمحبه دليل
مير نفسي لتقليب المواجع ضرت

طوّل الصمت وأربكت الشعور الجميل
قلت أببعد مدام أن الجروح أكثرت

خل دمعك يسولف للموادع ويسيل
ولا أنا دمعتي طاحت وهي مادرت

.......

‏أحسب أني يوم أعدي على الضلع المنيف
‏قلبي بـ يبرى صوابه و تركد ونّته

‏واقف مثل " المعزّب " على باب المضيف
‏بيت شعر كل ما قلت بنسى غنّته

‏( علموها ) لا تسامر ببعدي كل طيف
‏في رجا " ليل رسمته " و " صبح ظنّته "

‏مابقى لـ أنصاف الاحلام في صدري مصيف
‏صدري أنهكته دروب الحياة و عنّته !

‏يوم : عاد البال ممطور و الخاطر مريف
‏قلت ما تبديه عيني و نفسي كنّته

‏الليالي وقعها في النشاما وقع سيف
‏و البشاير في هماليلها ، متعنّته

‏القوي يضحك على طيحة دموع الضعيف
‏و البشر من طاح بيدينها ما حنّته !

‏لو تعلمنا نصايح " بركات الشريف "
‏( كان مندوب المحاكم قصرنا منّته )

‏واهني اللي توفّى على الدين الحنيف
‏ما بعد خالف نبيه و بدل سنّته

‏جعلني لا جيت في بيته المعمور ضيف
‏أخسر الدنيا و أهلها و أفوز " بجنّته "

.....

حاول تخلّي جلستك عند العرب ركعة وتر
‏خفيفةٍ تقضي لزومك كل ماصليتها

‏وحاول تخلّي كلمتك عند العرب ليلة قدر
‏كلٍ يدورها ولا يدرى متى توقيتها

‏وحاول تخلّي كلمتك وقت العتب رشّة عطر
‏يفطن لها المخطي ولاتندم إذا رشيتها

.....

ابغى اشوف الثرى والناس دايم بخير
‏حتى تنام البشر ونفوسها رايقه

‏يحزني الفقد والحاجه وضعف الكبير
‏ودي الحوايج تجي سهله مهي عايقه

‏يارب لا تترك على الارض هذي فقير
‏ولا تخلي الصدور الطيبه ضايقه


.....

تدري وش إللي ماتجي بالملايين
العافية لا صرت محروم منها

وتدري وش إللي حدّها حدّ سكين
الحاجة اللي مانت قاوي ثمنها

وتدري وش اللي ماتوّفي لها الدين
اللي غذتك بصغر سنّك لبـنها

وتدري وش إللي راجحه بالموازين
سجدة سَحَر لاناموا الناس عنها

......