رحلت يابدر ولم ترحل مآثرك

لليل احبك مابقى في السما نور
والى ضواني الليل .. للصبح أحبك

واللحظة اللي كلها عند وغرور
أشوف قبري بين عينك .. وقلبك

في صدري سراجٍٍ حزينٍٍ .. ومكسور
رغم المطر والريح .. شلته في دربك

والله مابه غير لوعاتي قصور
وخوفي عليك الله ربي وربك

ما بي جهد ابني على صمتك جسور
لا حيرتني أسباب سلمك وحربك

العمر أحبك .. مابقى فيني شعور
والى جفاني العمر .. وشلون أحبك

الأمير بدر بن عبدالمحسن

نامت الشمس .. واستيقظ عناي
حال دون الكرى طيفٍ ضوى

ساعة أقبل نطحته من عماي
وصحت يا سيدي .. طال النوى

أحسب إنك معي ليتك معاي
يوم ضميت بيديني الهوى

يا بعيدٍ عليه انزف دماي
لاقضى الصبر .. ولا الشوق ارتوى

نبتة الدم .. تورق في حشاي
من سببها ترى حالي ذوى

وين أنادي ومين يسمع نداي
صرختي فيك .. وسكوتي سوى


الأمير بدر بن عبدالمحسن

كل ما أقفيت . . ناداني تعال
وكل ما أقبلت عزّم بالرحيل

وكل ما أجنبت واعدني شمال
يا أهل الحب ضيعت الدليل

الحقيقة غدت مثل الخيال
هو عدوّي . . وهو أغلى خليل

شفت أنا الظلم من بعض الدلال
يجرح القلب لو كانه جميل

أشهد إن الهوى ما به عدال
هو خلي . . وأنا قلبي عليل

وكل ما قلت له يا ابن الحلال
المحبة عطا . . وانت بخيل

التفت لي وهو عجل وقال
لذة الحب في الشي القليل

الأمير بدر بن عبدالمحسن

على النوى علمي .. بهم هجعة الليل
نجل العيون من البكا كحلها سال

واليوم غير الياس.. قل المراسيل
يا من يطمّني عسى ليلهم طال

الله على اللي ما صفط لي غرابيل
لاشك شرع الحب همٍ وغربال

قفّى ولي في حجر عينه تعاليل
تقول يا ذا البعد نجزيك بوصال

وتعلقت روح الليالي المقابيل
و يا عنك ما يامن من الوقت رجّال

لا ما علي لو دمع عيني هماليل
الموت دمع القلب لا صار همّال

الأمير بدر بن عبدالمحسن

أقوم بجبالٍ ولا أقيم في سفح
لو أطعموا لحمي لعوج المخالب

يابنت مابه ذنب يصعب على الصفح
كود الهوان وعيش سحم الثعالب

لاوالذي كرّم جديلك عن النفح
العز ماهو بين شاري وجالب

الله خلقنا .. تلفح وجيهينا لفح
حر السمايم في عزيز المطالب

سوى رضينا أوطفح كيلنا طفح
عض النواجذ طبع والطبع غالب

الأمير بدر بن عبدالمحسن

لا والذي سواك ما اريد سلواك
ما أخبر به نفسٍ تمنت قدرها

وكان التفرق يا ادعج العين عناك
أنا الذي روحي عذابه صهرها

والله لو ما اعي .. نفسي برجواك
واجزم وَكاد إنه يهمك خبرها

لأطفي شعاع العمر .. لا غيّب ضياك
عميت عيونٍ ما يطولك نظرها

أغلي حياتي .. من ثواني بها ألقاك
لولاك ما تسوى حياتي كدرها

ودنيا خلت من صافي الود وياك
يا عل تكسف شمسها مع قمرها


الأمير بدر بن عبدالمحسن

كل ما دعاني الشوق للقلب الأول
القى مكان القلب في الصدر تنهيد

وطيوف ذكرى في الحنايا تجول
تجمع صور وأوراق من باقي العيد

مدري سبقني الوقت والا تحول
أخلف ربيعي وادهرن المواعيد

أو هو الصبا .. نجمٍ رقى ثم حول
غاب وسما وجهي مشيب وتجاعيد

أحبابنا ليت الذي راح طول
وليت الذي باقي لما فات تجديد

انتم مثل قلبٍ عرفته امنول
وأصبح مكان القلب في الصدر تنهيد

الأمير بدر بن عبدالمحسن

على طريقة البدر الذي لا يغيب أقول :

لا غاب نور البدر في عتمة الليل
اشوف نور البدر في جوف صدري

أنا حزين الأمس واليوم بالحيل
لا جف دمع العين ما جف حبري

واقف مع المعنى نعيد التفاصيل
يقول مات البدر يا كسر ظهري !


أصّبر المعنى بـذكر المـواويل
و اصيح بأعلى صوت يا بدر بدري

بدري رحلت وعاد في لك مراسيل
قلت وأغاني من لظى حرف سرّي .

تنتظر مني حكي ..

المس على صدري و تشوف

كم خفقه اتعبها الوقوف !

وكم عبرة جت لك تشتكي !

المس على صدري شوي ..

ترى الشعور اللي قتلني

بغيبتك .. طوّل شوي!

شف كيف عيني تنكسر..

والخاطر اللي منكسر

قلبي.. و إحساسي .. و أنا !

شف كيف جرّحنا الظما ..

يا صاحبي قلبك عمى !

ولا إنت ما ودك تشوف ؟

عطني يديك ..اشتقتها ..

لو تدري كيف احتجتها..

احتجتها وعجزت اقول !

و إن قلت .. خالفني الكلام !

خايف علي من قسوتك يا قوتك

شفني بعد ما مرّ عام!

و الشوق ما مل و تعب

خذني و علمني الكذب

و إني انا ما عاد احب!

و ان الكلام اللي مضى
ماضي ولا اظنه يعود ..!

و لا تعال احضن يدك ..

و اسمعني لا قلت و حكيت

و اسمح لي لا مني بكيت !

يا صاحبي ليتك تعود ..

رجع لي قلبي .. ولا تعود

و ان ما حصل لك مرني ..

و المس على صدري وشوف..

وش كثر بعدك ضرني !


الأمير بدر بن عبدالمحسن