فوق هام السحب ( الشعر الشعبي) على متن القوافي

‏مشينا على درب المعزه ونهج العود
‏وفي مدرسـة شيخ المراجل تعلمنا

‏عسى الله يبعدنا عن العيب والمنقود
‏وعسى الله فعيون النشاما يجملنا

‏
أحمدالبلادي

لو نطلب الناس لا سرت ولا ضرت
‏الخالق الله و احنا من مخاليقه

‏يامل قلب(ن) يغرد كل ماغرد
‏كنه يعبر عن اللي في معاليقه

‏ومنين ماكبر قرص الشمس واحمرت
‏كبرت على الضايق اللي مثلي الضيقه

‏يالله بنفحات جودٍ كل مامرت
‏يمر معها فرج ربي وتوفيقه

‏
علي الدعيه

‏يالله برزقٍ يطاول ناطحات السحاب
‏ان زاد فيه بركه وان قل فيه بركه

‏رزقٍ بيوم التغابن فيه ظل وزهاب
‏يومٍ ب هوله ماتسمع للعباد حركه

‏إلا قريع الظما قرقاع شنة ركاب
‏طاح الرديف وجثا الركبي على مبركه

‏الناس تزحف من الاجداث يوم الحساب
‏لو تبلع الريق حتى الريق ماتدركه

‏
محمد بن مريبد العازمي

‏احيان اجيب لمخطي الراي تصحيح
‏واحيان .. مدري عن خطاي وصحيحي

‏يالله بحظٍ مايخليني اطيح
‏وان طحت مايدري حدٍ عن مطيحي

‏
فواز العزيزي

الطيب يرقى بك علـــو المـشاريف
‏مثل التواضع من صمــــيم المروه

‏الرد بالقســوة مثل ضــربة السيف
‏تزيل من بعــض القلــوب الاخــوه

‏والجاهل اللي في كلامه تخــــاريف
‏تجاهله واعطه على حســــب جوه

‏اكرم خصومك مثل ما تكرم الضيف
‏الغيـــث سامــي في بروقه ونــــوه

.......