فوق هام السحب ( الشعر الشعبي) على متن القوافي

ياطير شارب من عنا الوقت كاسه
ولاني هذاك اللي من أول قوي باس

ياطير، تحتاج السياسه سياسه
وأنا بسيط أنقى من الميّ بالكاس

عيا يجي حظي بـ لين وسلاسه
وعجزت أنام إليا لحق عيني نْعاس

وعجزت هذا الوقت لا أعرف مقاسه
وفي راسي من الشكّ ألفين وسواس

....

سلامي على اللي حبها ساقني للجال
‏وقامت تليّن في طبوعي وانا قاسي

‏تمر المره من عقبها كنها رجال
‏ما والله تحرك شعرةٍ من شعر راسي

محمد المقحم

‏الوعد لاوقفنا يوم عرض الصحايف
‏واحدٍ في ظلال وواحدً في مليله

‏يوم تلقى كفوفك من ذنوبك غرايف
‏يوم كلٍ يشيل اللي فعل في شليله

‏يوم تشهد علينا يابسات الشفايف
‏يوم حتى البهايم ما تجنّت تشيله

‏كل رمحٍ ركزته بالضلوع الرهايف
‏كل حلمٍ هدمته له عيونٍ تخيله

‏كل ليلٍ رقدنا بالعيون الذرايف
‏كل غيضٍ كظمنا بالضلوع النحيله

‏كل همٍ تهامى بالليال العجايف
‏كل حزنٍ تنامى كل ليله طويله

‏كل كلمه بلعنا شرّها بالكلايف
‏جعلها بالصحايف عند ربي ثقيله

....

ياحبيبي والمحبه بدايتها سؤال
والنهايه قسوةٍ تكسر الغصن الندي

والذي فضّل جمالك على كل الجمال
أنك أغلى من عيوني ودمّ جسدي

معك جربت الهدايه وجربت الظلال
قلبي أعلن لك ظلاله وعقلي مهتدي

والهروب أحيان نوع من أنواع النضال
لا وطت رجلك طريق الضياع السرمدي

حطني في وجه حضنك من صدوف الليال
تايهٍ لا أخطيت من ضمتك وين أغدي

أخذني من واقعٍ ماعرف قدر الرجال
السنافي فيه يْغصّب على شور الردي

عن ضجيج الناس والمجتمع جاني جفال
كن ما ذولا بـ ناسي ولا ذي بـ بلدي

مستعد أبيع عمري لأجل كلمة تعال
في رجا ليلي وصبحي وريحة معبدي

والعيون اللي هدبها ينادي للقتال
صوبتني باللواحظ وبيحّت جهدي

وأن شعرت بيوم في حبنا بـ الإبتذال
ردني لأول جروحك ترا صبري مدي

غبّ على كيفك وأنا بين هقوات الوصال
أتحرى لك وروحي على راحة يدي

وأكتبك بشعر والشعر دوامة خيال
يتضّح فيها بعيد المدى والمبتدي

وكاني مارويت الأسماع بسحر الحلال
طحت من عين الثريا ومن عين الجدي

....

‏جوِّد يديني أنا ماطحت فيك الا متساوي
‏وأنسني بين الكلام وبين سلسالك وجِيْده

‏لين أمدّ الأرض وأسري لك مع الأمر السماوي
‏وأتشدَّد فيك لابه وأهتدي عينك عقيده

‏جعلني لا أشتد عزمي في هواك وجيت غاوي
ماتذكر ياحبيبي غير الأيام السعيده

....