يا جارنا

كل طرح راسه وغـط وتهنّـا=الا الوحيد اللي سرى في خياله
ابيوت نهدمهـا وبيـوت تبنّـا=ندور الجزل ونحـب الجزالـه

الله يجزا خاطـر الشعـر عنّـا=والله يجمل من يحـب الجمالـه
كله علـى فكـرة وفكـر تعنّـا=خطوى الذيور اللي عليها جفاله

ترد الخواطر فيـه منّـا ومنّـا=كن فيه حفلة عرس يوم احتفاله
سبايب اللي جر صوتـه وحنّـا=قلوبنـا خضـر وفينـا هبالـه

الله درى هو جارنا يـوم غنّـا=هو من هوى والا يغني جهالـه
كنّا نجر الصـوت مثلـه وكنّـا=نرد الهوى من يم وادي تبالـه

نلاحي الورق ويجـاوب لحنّـا=والعشب لعب الطايفـي بقذالـه
كم وقفة مع خوط مـوز تثنّـا=في ظل شجور كثيـف ظلالـه

لكـن ظـروف أيامنـا فرقنّـا=تم الفراق وحالة القلـب حالـه
كل نصا دار وهـو مـا تهنّـا=الا الظما اللي من حبيبه بقا له

لو انهـا تجـي علـى ماتمنّـا=راع المحبه من مود صفا لـه
مـاط اللثـام وقبّلـه واستكنّـا=في حضنه وداوا من الوجد حاله

لكن يـرد النفـس شيمه،وانّـا=نخاف من ربي عظيم الجلالـه
فيـا جارنـا بالله لاتمتحـنّـا=لاتمتحن قلبـي بلالـه ولالـه

خل الجروح تموت صوتك شحنّا=سّرى الخيال لواحد فـي تبالـه

صح لسانك

يالاكلبي ولاعدمناك

قصيدة سهلة ممتنعة قوية رائعة

ونعم واسلم وزد

تقبل تحياتي واعجابي

صح لسانك يا الاكلبي والله لا يهينك



قصيدة طيبه من شاعر اطيب


كم وقفة مع خوط مـوز تثنّـا=في ظل شجور كثيـف ظلالـه

البيت هذاوقفة عنده كثير اتمنا منك تفسر لي معنى شجور




دمت بخير

أخي دماوي

وأخي ابراهيم بن طهيفان


شكرا لكما على المرور

وتشريف القصيدة

لاهنتما

صح لسانك وبيض الله وجهك على هذه القصيده الرائعه
إعجابي فيها تجاوز المعقوول..

فبارك الله فيك

صح لسانك وبيض الله وجهك

قصيده رائعه من شاعر رائع

صح لسانك أخي أبو معاذ وبيض الله وجهك

قصيدة رائعة جدا

لاهنت يالغالي ولا عدمناك

تحياتي واحترامي

اشكرك ياشاعرنا والله يعطيك العافيه

صح لسانك وبيض الله وجهك
على هذه القصيده الاكثر من رائعه
تقبل مروري

بيض الله وجهك الله يعطيك العافيه