تراث ماضي في حضاره وعنوان احيــــوه ناسٍ تفتخــر فيــه وتبين🌳

تراث ماضي في حضاره وعنوان احيــــوه ناسٍ تفتخــر فيــه وتبين

صورة العدد (عدسة - ماجد المعيلي)

إعداد - بكر هذال

حرفه وفيها من الفخر رفعة الراس

راحت بها الايام هي والليالي

شغل السدو في وقتها عز نوماس

لاصرت في الجو الخلا في الشمالي

عاشوا بها عيشه شريفه مع الناس

حرفه من أرزاق البشر من حلالي

خالد بن ناصر المخيمر - روضة سدير

السدو له ميزه في ماضي الأزمان

وصناعةٍ مبطي لها وقت وسنين

يوم الحريم تشدها اشكال والوان

هذا التراث اللي من أوّل والحين

تراث ماضي في حضاره وعنوان

احيوه ناسٍ تفتخر فيه وتبين

حمد عبدالله الوايلي - حوطة سدير

الخلايق ساكنه في بيوت وفي قصور

وأحيان تشكي من الضيق ما تلقى سعه

يا سقا الله وقتنا اللي مضى كان له دور

والتراث يريد من هو يجيه ويجمعه

عبدالله بن عبود السهلي - الجبيلة

بنت الحلال الجالسه بَوَّل السَّدُو

فَنٍّ وتفكير وحلْوَات الألوان

تراثنا تلقاه بالرِّيف والبدو

باقِي ولِه بقلوبنا اكبر الشَّان

سعود عائش الحربي - جدة