ياقلب ياقلب الشقا ويش مغضبك

ياقلب ياقلب الشقا ويش مغضبك
من جور وقتك صايرن بك حماقه

ماخذت عبرة من نتائج تجاربك
عكست مفهوم العداوة صداقه

ياما غلطت وغلطتي من سبايبك
تدخل مجال(ن) وانت خارج نطاقه

ماني على شئ(ن) مضالك معاتبك
لازم نصحح نقطة الأنطلاقه

ياصار غلطات الخلايق تجنبك
لاتنفعل مادام مالك علاقه

ترى الرفاقه باللوازم جنايبك
عزي لمن يحتاج ماله رفاقه

ياصرت بحماهم ترى خاب طالبك
خصمك ذليل وصار حقه شفاقه

لو رخصوٌا بالسوق غالي جلايبك
البيت مايذري بليا رواقه

ولاكل بيت(ن) ياتذريت يحجبك
بصلف الهبوب اللي سريع أصطفاقه

بعض البيوت عن الهبايب ذرا شبك
ماينقعد باللي هتيت(ن) شقاقه

وعن العلوم العوج نزٌه شواربك
لاخير في هرج(ن) على غير فاقه

وترى جليس السوء للسوء يصحبك
لاتنخدع باللي علومه رقاقه

وترى الكبر بين الخلايق يخربك
تصير من بين المخاليق عاقه

لو انت تدي بالمواجيب واجبك
طابع غرورك زاد عقلك مصاقه

وعليك باللي يانصيته يوجبك
لذروة سنام المجد زاد أشتياقه

عادة رفيع الساس ياقف بجانبك
والا الردي وقت اللوازم علاقه

ترى الردي لو هو من أقرب قرايبك
أكبر غنيمه ياحصل لك فراقه

يا اقفيت بصدور المجالس يعذربك
ويا اقبلت رحب بأحترام ولباقه

ولياضهدك الوقت زوٌد مصايبك
قام يتعلم باليتيم الحلاقه

نوبٍ قريبٍ لك ونوبٍ محاربك
مثل الشري مذكور مرٍ مذاقه


مشفي الجرواني

شكرا لك على الطرح المميز..
جزاك الله الف خير على كل ما تقدمه لهذا المنتدى
الله يعطيك العافيه يارب
خالص مودتي لك





اهلا بالاخت الغالية
ومراقبتنا الجميله
ريحانه شمران
اشكرك جزيل الشكر لتعقيبك
الرائع والمميز
لك مني أجمل تحيه وتقدير
لاعدمتك

أخي العزيز الحمدان
شكرا لك على هذه التواجد الفعال
والمشاركات النافعه والمفيده
فبارك الله فيك وجزاك الله خير