الأيام ظلما والليالي عديمة راي

الأيام ظلما والليالي عديمة راي
مشاويرها حرمان ودروبها حره

خذت مني أغلى ماتمنيت في دنياي
وخلت لي اللي كم تعوذّت من شره

أنا بخير والله لو معي ذاكرة نسّاي
ماهي بالحنين ولوعة الوجد مضطره

تفاصيل ماترحم وقوفي ولا ممشاي
وجعها يجي ويروح ويعاود الكره

سلامي على المتحكمه بزعلْي ورضاي
وعلى الغره اللي طوقّتني على غره

ولا هان عُودٍ شوفته تطلق محيّاي
نسيم الهبوب يداعبه كل مامرّه

هذي جرته في مرتع الصدر رايح جاي
من أبسط حقوق الحر خطواته الحره

يامحبوبتي لازال كوعي على مركاي
تحلويت صكّات الليالي وهْي مره

أنا أجر قلبي مع طريقي وأجر خطاي
وأخاف أجرحه ويسيل دمي على الجره

تغربّت حتى عن ربوعي وعن مرباي
أحس الوطن مافيه عارض ولا حره

بعدك الليالي صوتها صوت عازف ناي
يهيّض جروح القلب ويقلّب الصورّه

إذا مابقى حنيةٍ تستعيد قواي
حنانيك باللي يقطع الشوق بالمره

وقوف الحياد أستنقصه من سنين صباي
أشوف أهله فـ الغالب أصغر من الذره

لاشان الزمان يضرني واحد من عداي
ولا غالي لاسرّ وضعي ولا ضرّه

لو الموت مرّه ماتعنيت في دنياي
أنا أشوف لي حييّن ماتوا مية مرّه

....