تركت الهوى ماعاد ابي طاري الهوى

بديت بذكر الله على كل ماطرى
مجيب الدعاء معطي العطايا الجزايل

تركت الهوى ماعاد ابي طاري الهوى
ولاقايلن بخيار قوم مثايل

ولا عاد لي في باقي الاشياء حسايف
ياكود مشاهد راس شيخ بحايل

محمد سلطان العرب موهب الذهب
هو خير من تاتي اليه القبايل

تشد النضى من كل صوب وتجي له
كما تاتي للبيت الشريف الرحايل

ومن جاه يلقى رهبتن من جنابه
ومن راح مغلول يزيده غلايل
سهل على الدانين صعبن على العداء
ياكن عيونه صلو جمر الشعايل

فهيم عديم يرهب القلب عارف
ياكنه يقراء الغيب وافي الخصايل

ولاشي غير الخمس ماهو بعارفه
من بخص ساساته وبخصه دلايل

يشوف عيان مابدا بصدوره
ويشوف من المقفي نحور الاوايل

وعد الاماني كلهن وسط كفه
والا على مضمون سيل يسايل

اليا فتل فتل باالاسباب ناقظه
على كل حال ولا لفتله محايل

صبور على العلياء جبور عن الخناء
جزوعن رثوعن لا أوجس الشد مايل

مثل رثعته بمطير ماهي خفيه
نهارن يشيب اطفال سود الجدايل

عقب مبانيهم وغاوي حلالهم
باقي الشرايد يطلبونه زمايل

عبدالله بن سبيل