لحظة صمت

عندما ارتحلت لدبي هزني الحنين لكي .

لحظة صمت ... وأتفجر الجفن ينهال
واغرورقت عيناي بالدمع تبكيك
كفي ارتعش أو حرك الأرض زلزال
أو هزني شوق برق وسط عينيك
جاد الحزن واستوطن الصدر واغتال
قلب نقش في داخله كل امانيك
راحل وانا اشرب من الحزن بدلال
راحل وانا شفت القبر في شواطيك
يامترفه ياموثقه القلب بحبال
كيف ارتحل كيف ارتحل كيف اخليك
يامنيتي حزني غزا الكون بظلال
مد الاسى حتى سكن في نواحيك
راحل وانا في داخلي الف تمثال
صممتها باروع جمل صغتها فيك
انتي فقط ...ترخص لك دموع ورجال
وانتي فقط... اقطع لك العرق واسقيك
فوقك سطع لون الذهب ذاب برمال
متغرطسه من يشبهك في تغليك
وفوقك سرب طير القطا صار يختال
يمشي ولع من لهفته في نواحيك
فوقك قمم متربعة الصدر بجبال
متعاليه فوق السحب تفتخر فيك
فوقك مدن متشابكه مثل سلسال
مترابطه برجالها لجل تحميك
فوقك قصص تروى عن اجيال واجيال
بدمائها تروي الارض لجل تبنيك
وفوقك ملك يشهد له الكل بافعال
صارت عقد في نحرك اليوم تحميك
يالمملكة ياشيخة الزين رحال
راحل وانا في عيني الدمع يرجيك
يالمملكة حنا لك دروع واغلال
يالمملكة حنا قبور لاعاديك
يالمملكة فيك الحرم مهد لازال
يحظن امم من اخر الارض تلفيك
صقر العرب امن لهم درب وظلال
واشعل لهم في ظلمة الليل اتريك
يالمملكة لاتسمعي كل من قال
دون النظر في واقعك قبل يطريك
حنا معك خلف الملك دوم نغتال
صوت العدو اللي من الكره ينويك
يالمملكه قل الشعر فيك او طال
انتي هنا صعب بقصيدي اوفيك
غني معي ياديرتي بكل موال
لجل المحك وسط اللحن في اغانيك
وخلي العلم في وسطه السيف في العال
لجل ارفعه لو هزني الشوق واطويه
استأذنك ياساكنه القلب رحال
راحل وانا في عيني الدمع يبكيك

ناظم الهمسات