لو بودّي قلت للمسكين لا ترجي معونه ** وان نشدني من هذولا قلت هذولا البطانه

اشهد ان الناس بالناس ورجاها في المعونه
والمعونه بيد ناسٍ ما توصّوا بالامانه



ناسٍ اوصوا بالضميروعاشوا اكثرهم بدونه
واصبحوا طابور خامس يحترك في اهم خانه




ينسجون من الولاء والطاعه اللي ينسجونه
والحيل ما تظهر الا بعد ما تطيح الميانه




يشغلون الريس بذر الرماده في عيونه
لين تلحق بصمة الابهام مفتاح الخزانه




بيدهم حتى اتجاه البوصله ويغّيرونه
يعني تغطّي مكانتهم على كبار المكانه




جّدهم فيه العذاب ومزحهم فيه الخشونه
وصّدهم فيه الضياع وشورهم فيه الخيانه




في كنفهم درّسوا تكميم الافواه وفنونه
عندهم حتى من النقد المباح اعلى حصانه




كنّهم يستمتعون بشرب الاكباد المهونه
آه .. ما كنا شراكا في البلاد وفي الديانه




كم محوا رقم الميه واختاروا اية رقم دونه
كم بدا الايمان ظاهرهم وباطنهم لعانه




كم خذوا من زخرف الدنيا ولا خلّوا مئونه
وتركوا حاجات خلق الله على درب المهانه




كن ربي ما خلق بقلوبهم ذرة ليونه
كل واحد منهم مسّوي لنا عنتر زمانه




لو بقوا كم عام مفتونين في الدنيا الفتونه
يسرد التاريخ اساميهم بشي من الاهانه



لو بودّي قلت للمسكين لا ترجي معونه
وان نشدني من هذولا قلت هذولا البطانه

لشاعر الأندلس ناصر القحطاني

اللهم احفظ بلادنا وحكامنا وأصلح بطانتهم