لا والله اللي راح وقت الصقارة

لا والله اللي راح وقت الصقارة
والبر ما يعجبك لارحت دوار

البر عج ومدلهم غباره
الشكوى لله ميته كل الاشجار

وماتت دباديب الخلا بالجحارة
قضى عليها الجوع من قل الامطار

نشكي على اللي رزقها باقتداره
اللي نصر موسى على سحار

الله يعيد لكل وادي خضاره
ويغيثنا ويبدل العسر بايسار

غيث من المنشا يعم انتشاره
دفاق رفاق حقوق ومدرار

هذا ووضعي حول طيري مداره
ابي نظر توجيه ذربين الاشوار

الطير نقله يالنشاما خسارة
ينعاف لو هو يذبح الصيد وخيار

ياسمير ياراع الولع وانت كاره
يابن صليهم مكرم الضيف والجار

محتاج رايك ياحكيم العبارة
رجال عرف ومن طويلين الاشبار

عطني نظرك الطير قطّع شكاره
عانى من البرقع غرابيل واضرار

من قل تفريعه تصيبه حراره
نقنص ونرجع ما تمغط ولا طار

انا اطلقه والا اتحمل وزاره
ياسمير انا من قصةالطير محتار

ياسمير ما شفنا من الطير باره
بلاه قل الصيد والطير ما بار

حبه بقلبي باني له عمارة
على حجر وفروعها عشرة ادوار

شعبية عندي تمثل سفارة
لو كان دور الطير مقفي ومنهار

تذكر عليه نوزته وانحداره
يشره على زرق الغلب وقع وطيار

يازين تفريعه بخطو الزبارة
بالنازية ما بين جدلا وسنّار

خطو اشقر مابه ملوع ونزاره
بالوكر ما يكفخ وللخرب حشار

واظن عايش ودعه باختياره
ماشاف له بهواية الصيد معبار

اطلق سراح الطير واصدر قراره
من عقب ماهو للمناعير سبار

ياما جهم للصيد باول نهاره
ايام هندابه مع الطير مختار

هده على المضياح من راس قارة
واهوى على روض نواميه نوار

وادلى على خرب كبار فقاره
واعلق به اللي للحفافين جزار

يوم الولع له ذوق فن ونهاره
وعايش يطلع من عكاشات وايسار

واليوم ناشه من زمانه غياره
لاباس يالطيب عسى خير ومجار

اللي فتل قيدي فتل له هجاره
على الشرف ماهو على موتة النار

والسيف لا بد له من الاندثاره
والحصن يخلف جريها طول الاعمار

واللي حذف باول شبابه جمارة
يشقى بها غيره ويقنع بما صار

وجهتها والحر تكفيه اشارة
رجال كلمتهم ثمينه وشعار

واللي يشاور ينتظر مستشاره
والشور له عند الرجاجيل مقدار

ومضمون وضعي للولع واختصاره
يالربع ماني عن غلا الطير صبار

غديت مثل اللي عليه الخفارة
بالبيت جالس بين فيّه ومصهار

ما ارتاح في جو البلد والحضارة
هوايتي شوف الصحاري والاقفار

ولا لي هواية باكتساب التجارة
والرزق عند اللي خلق خلقه اطوار

وارسلت كلمات احترام ووقارة
واقع وفا ماقلتها زيف وقمار

ورسالتي عني تنوب الزيارة
قصدي بها نوع استشارة وتذكار

مندوبنا جاكم وخوذوا اخباره
يا هل الكويت وحمضونا بالاخبار

ياهل البلاد اللي عزيز جواره
اخواننا واعواننا سر واجهار

الدين واحد والهدف والادارة
اسلام بالعليا رمز واشعار

نسير مع هدي الرسول ومساره
الدين واحد والعقيدة والانظار

ضد البغيض ليا تشايط عشاره
ليا طار في جو السما عج وغبار

وصلوا على الهادي رسول البشارة
عداد ما سار القلم فوق الاسطار


بدر الحويفي

شكرا لك على الطرح المميز..
جزاك الله الف خير على كل ما تقدمه لهذا المنتدى
الله يعطيك العافيه يارب
خالص مودتي لك

المشاركة الأصلية كتبت بواسطة ريحانة شمران

شكرا لك على الطرح المميز..
جزاك الله الف خير على كل ما تقدمه لهذا المنتدى
الله يعطيك العافيه يارب
خالص مودتي لك

اهلا بالاخت الغالية
ومراقبتنا الجميله
ريحانه شمران
اشكرك جزيل الشكر لتعقيبك
الرائع والمميز
لك مني أجمل تحيه وتقدير
لاعدمتك

أخي العزيز الحمدان
شكرا لك على هذه التواجد الفعال
والمشاركات النافعه والمفيده
فبارك الله فيك وجزاك الله خير

المشاركة الأصلية كتبت بواسطة حسن بن عبدالله

أخي العزيز الحمدان
شكرا لك على هذه التواجد الفعال
والمشاركات النافعه والمفيده
فبارك الله فيك وجزاك الله خير

أرحب أخي الغالي
ابو حوفان
اشكرك جزيل الشكر لتواجدك
ومرورك الكريم
لك مني أجمل تحيه وتقدير لاعدمتك