مقدر اكرهك لكن مقدر أحبك

مقدر اكرهك لكن مقدر أحبك
بين متناقضات الذات وش جابك

لا خفق لك خفوق ولا تحدر بك
دمع عيني ولا جرحي تغنا بك

كيف أجل صارت عيوني تخاشر بك
ليه طارت بعيوني زحمة اسرابك

كيف حبك تسلل دون ما اشعربك
كيف صرت أفقدك واحن لعتابك

كيف انا محيرك صرت اتحير بك
الشعور اتجاهك صار متشابك

ما اقدر أكتم غلاك ولا أقدر أجهر بك
بيني وبين نفسي ضعت باسبابك

رحت عن شرق حبك جابني غربك
وضعت في ضحكةٍ من ثلج عنّابك

وين جيتي وانا اللي ما ابي قربك
حسبي الله على تسبيلة أهدابك

ارتوتني طيوفك قبل أصبّر بك
ليت ما صار لي في غيبتك صابك

صارلك بالحشا مدهال عامربك
كل عرقٍ وطته خطاك حيابك

قلت: أبسأل خفوقي وأتعذر بك
وإلا ّ أنا خابر عروقي تطرا بك

جاك قلبي بسلمه متقي حربك
كن وسطاك تلعب به وسبابك

أشهد انك وصلتي ودلني دربك
وأشهد أني دخلت من أوسع أبوابك

صالح السكيبي