قصيده للشاعر الكبير عبدالله ابن زويبن الحربي

بسم الله الرحمن الرحيم
السلام عليكم ورحمة الله
يسعد اوقاتكم بكل خير



إن كان تنشد عن علومي وأنا صبي = ابتذكـرهـا واعلـمـك عـنـهـا

لو هي بصفحات ٍ طواها الزمن طي = جرة مطـر جاهـا عجـاج ودفنهـا

ألعب طواريق الهوى مع هل الغـي = اثقـل المعنـى واخفـف لحنـهـا

والشعر يبقى في قلوب العرب حـي= ولا كل من سوى القصيـدة تكنهـا

وأنا حداها حدي الاصعـاب بعصـي = واقودهـا قـود الاديـب برسنهـا

والحب مردوده على صاحبـه سـي = كـم ضحكـة ونَـات قلبـي ثمنهـا

أذكر سنة تسعه وتسعيـن هجـري = الـف وثلاثميـة بدايـة زمنـهـا

زلت بي الاقدام للشمـس مـن فـيَ = اقـدار والاقـدار تومـر وتنهـى ّّ

غافل وجتني من كوت خافقـي كـي = كيـة عطـب لـولا طبيـب مكنهـا

أبعدت مضربها عن الصـدر بيـدي = ولدَت على كبـدي برمـح طعنهـا

وعرفت ماتخفيه في صدرهـا لـي = من واقـع النظـرات منـي ومنهـا

نظرت فيهـا مثـل نظراتهـا فـي = وعجزت اقاومهـا وصديـت عنهـا

كل النساء ظلماء وهي بينهن ضـي = غطت شعاع الشمس أشعـة بدنهـا

من الذهب تلبـس خلاخيـل وحلـي= سـود محاجرهـا وحمـر وجنهـا

مدري تسمى من ومنيـن ومـن أي= وش هي قبيلتهـا وموقـع سكنهـا

راحت وانا مااعرف من اخبارها شي= الا رمـوز الموتـر اللـي حضنهـا

مدينة من بيـن ابـو ظبـي ودبـي = لعلهـا كاننـهـا هــي وطنـهـا

تمطر عليها السحب هذي ورى ذي = وديـم الليـا قفـى تراهـا ودنهـا



الشاعر الكبير\ عبد الله ابن زويبن الحربى

الشاعر عبد الله ابن زويبن الحربى شاعر غني عن التعريف وجزل ومهضوووم اعلامياً

ولاهنت ياسطام اختيار يدل على ذائقتك

قصيده رائعه كروعة صاحبها وناقلها .

بارك الله فيك اخي الحربي الكريم

قصيده جميله اشكرك

اشكرك على الإختيار

لاهنت وصح الله لسان الشاعر على جميل كلماته
سلمت على مانقلته لنا لهذا الشاعر

شاعر كبير ومتمكن وأبيات قمة في الروعة ..

يعطيك العافية على نقل القصيدة واحنا بانتظار جديدك

قصيده رائعه فصح لسان الشاعر عبدالله بن زويبن الحربي
شكرا لك اخي سطام الحربي على روعة مانقلت

اشكر كل من
1 عبدالله ابن غصاب
2 عبدالله علي بركي
3شاعره المشاعر
4 ابو حاتم الشمراني
5 ابو حامد
6 صالح عسكر
7 ابو حوفان
اشكركم على ردودكم الي تثلج الصدر وردكم على موضوعي بحد ذاته شرف لي
اخوكم
سطام الحربي

صح لسانه وبيض الله وجهه