راح ليل الشعر ما بين المعاني والجزاله

راح ليل الشعر ما بين المعاني والجزاله
في عيون الشعر دور الحرب بارود وسريه

شعر شاعر بالمشاعر شاع شعره واستواله
كيف ماجات القوافي جرها بالسامريه

اتزان الحظ واضح لو بدا عيب اختلاله
وانحلال الوصل جارح لو بدا سن الثنيه

ماتت عروق العنب والتوت يرثي ما بقاله
والنهايه فالبدايه والحكايه سرمديه

انجرح وجه المساء والكون يصرخ من خلاله
وانتحى فكر ولحى من دون مضمون القضيه

والشفق قبل الغسق لو يدفق الحمره سراله
بإتفاق الاختراق وبإنطباق الجاذبيه

والنكد بعد الرمد مثل الردى بعد الشكاله
والنخل لا مابخل لو شحت عروق ٍ نديه

والنقا روح التقا عند الشقا وإلا زواله
والاوادم لو تنادم مابقى نفس ٍ شقيه

والعيوب ذنوب والجاني على راس العداله
والحروب دروب صوب الموت ويدين المنيه

والجفا بعد الوفا بعد الصفا جرح ونكاله
والامور تدور من قبل العصور الاوليه

حسب تقدير الاله المعتلي رب الجلاله
خالق الخلق ومليكه عالم السر وخفيه

والرضا حين القضا بالمقتضا شرط ودلاله
والعفو عند اقتدار المرء من طيب السجيه

والفتن جرح الوطن وقت المحن فعل الجهاله
والخطا رد العطا جهل وسطا وسط البريه

والهوى لامن ضوى ماله دوى ياشين فاله
راعي الحب ودروبه ماتجيب الا الاذيه

وافتراض الاعتراض أدى الى سرد المقاله
والحقيقه مابقى غير الحروف الابجديه

اسمعوني وافهموني وصلوله ذا الرساله
كان باقي للهوى في قلب محبوبي بقيه

علموه اني شربت الحب من صافي زلاله
وعلموه اني نذرت العمر من اجله هديه

وعلموه اني سكرت من الهوى حد الثماله
وعلموه انه جعلني عن هجير الشمس فيه

وعلموه انه كتبني شعر في دفتر خياله
وعلموه انه وضع شمس المحبه في يديّه

وعلموه انه غزى الخفاق وأسرف باحتلاله
وعلموه انه تمكن بالحشا وال الرعيه

وعلموه انه عطاني وعد في مقبل لياله
ما يروح ولا يبوح ولو تفوح الشاذليه

وعلموه اني ابسهر في رجا رن اتصاله
وعلموه اني برجوى يا هلا يالله حيه

وعلموه اني احبه حب ما يخطر في باله
وعلموه اني احب مشاهده لو هي شويه

وعلموه ان القصايد من يمينه في شماله
فدوة ٍ لعيونه الثنتين مع زاك التحيه

وعلموه ان المشاعر كلها مني حلاله
وعلموه ان الخوي دايم على هقوة خويه

علموه وفهموه وصلوله ذا الرساله
والوصيه وسط مظروف الغلا نص الوصيه

شاعره لو غاب مادور على شخص ٍ بداله
مال لغيره في خفوقه شف وإلا قابليه

جزاء البقمي