ديوان قصائد لشعراء المملكة العربية السعودية (متجدد)☘️☘️

قصيدة أرفض وداعك
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
84 مشاهدة

ليه النهاية بالفراق..
عهد انكتب بين الأحبة والزمن؟
ليه المحبة والعناق..
دايم تكون جروحنا لأجله ثمن؟
ليه المفارق بالملام
ليه الموادع بالخصام
ليه أقبل أحكام البشر
أرفض وداعك والسلام
نجلس تحت ضيّ القمر
نتأمل الأيام ودروب الهوى
نتأمل قطار العمر..
لو نركبه لوين بنسافر سوى؟
يا للهوى لازم نموت
والا يفرقنا السكوت!
ليه أرفض أنصاف الحلول؟
عمري بحسراته يفوت؟
جرب ولو مرّه معاي..
نشعل ليالينا ولا تطفي أبد
العمر واحد يا غلاي
خليه يفنى حبّ خالد للأبد
بأعذب نغم وأصدق قصيد
غرام يشعل في الوريد
يذوّب قلوب الحجر
والحبّ يحيى من جديد

قصيدة شيء يزعل
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
83 مشاهدة

شيء يزعّل..
هالأنانية وهذا الكبر فيك
شيء يزعّل..
ما تحس فيني رغم صبري عليك
اللي ودك صار لعيونك وشوف..
صدق شكي واليقين
حتى خطواتك مشيناها وشوف..
كنا وين وصرنا وين
وش تبي فوق السنين الضايعة؟ أكثر سنين!
تدري أن العمر ما نقدر نعيشه مرتين!
شيء يزعل..
عزتي لك يالظروف..
من هو اللي ما رمى ضعفه عليك
وآه منك يالعناد..
أشهد أنه ما ربح من يشتريك
ما طلبت المستحيل
ما طلبت إلا القليل
بس توفي بالوعد
بالمحبة والعهد
قبل ياخذنا الرحيل
وإلا ذي صعبه بعد!
وش تبي فوق السنين الضايعة؟ أكثر سنين!
تدري أن العمر ما نقدر نعيشه مرتين!
شيء يزعل..

قصيدة حزين الليلة
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
83 مشاهدة

حزين الليلة..
حزين، مثل كل ليلة
وش الجديد..
لأجل أكتب قصيد
مدري..
الملل، نفس الملل
والأمل، ما له أمل
واللي بعيد، دايم بعيد
حزين الليلة..
حزين، وما باليد حيلة
حزين في ساعة فرح
ما هو صغير..
حزني أكبر
مثلي كثير..
ويمكن أكثر
اللون الأصفر..
زال من بين الشفايف
والكل حولي..
إما غاضب وإلا خايف
ساعة فرح..
مثل الغروب من الشحوب
نضحك جميع..
نخاف لا الضحكة تضيع..
ولا عاد ترجع للقلوب
حزين الليلة..
حزين، وما باليد حيلة
متى يغيب الحزن عن كل الحياة؟
ليه الفرح دايم يبالغ في حياه!
حزني وفي..
حزني أبد ما يختفي
إن غاب عني يوم، عاد
شوقه لجرحي بازدياد
يا ربّ باكر..
نلقى لهذا الحزن آخر..
وينال قلبي مبتغاه
حزين الليلة..
حزين، وما باليد حيلة

قصيدة صرخة ندم
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
82 مشاهدة

أنا.. وأنا
وأنا.. وأنا
هالكلمة اللي كلّها كبر وغرور
من قالها ما يراعي لخله شعور
إلاّ أنا.. إلاّ أنا
بقولها مكسور.. بالحيل مكسور
أنا اللي ما ذقت الحياة.. إلا بك أنت
وأنا اللي روحي تتبعك.. وين ما كنت
يا من بحسنه يجرح البدر بالنور
أنا ملكتك وضعيتك بأفعالي
أنا توقعتك اللي بحاجة وصالي
مغرور..
مغرور..
كلٍ يحبك وثمّن قدرك الغالي
كلٍّ فرش ورد المحبة بدربك
كلٍّ عرف وشلون يبقى بقلبك
إلا أنا.. إلا أنا
أنا صرخة ندم.. وياليت الندم ينفع
وأنا دمعة ألم.. وياليت الألم يشفع
يردك يا بعد كلّي
أضمك في عيوني فدوتك..
وأغفي تحت ظلّي
بس اللي راح ما يرجع
أنا ياما جرحت إحساسك العذب بكبر وإصرار
وإصراري وضع بينك وبيني حاجزٍ من نار
ودلّيتك بنفسي للفراق دروب
وأسبابٍ بها ما أنطق بكلمة
تعذبني ولا أبدي سوى البسمة
أنا القاسي..
وأنا نسّيتك الرحمة
أنا ملكتك وضعيتك بأفعالي
أنا توقعتك اللي بحاجة وصالي
يا أنا.. كم أكرهك
كره الأمل للموت
أجمل سنيني معك
حطيتها ف تابوت
اختلط يومي وباكر ويّا أمسي
أكره أفكارك
أكره آرائك
أكره أشعارك
آه.. يا أنا
وش بقى؟ صرت آتكلّم ويّا نفسي
وش بقى؟..
راح اللقا.. وحلّ الشقا
يا حبيبي ليتك تشوف اللي يبكيك
كيف عايش، كيف يصبح، كيف يمسي
وهو دايم يقول..
أنا ملكتك وضعيتك بأفعالي
أنا توقعتك اللي بحاجة وصالي
مغرور..
مغرور..
كلٍ يحبك وثمّن قدرك الغالي
كلٍّ فرش ورد المحبة بدربك
كلٍّ عرف وشلون يبقى بقلبك
إلا أنا.. إلا أنا

قصيدة وصايا العز
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
82 مشاهدة

داوي طعونك من سيوف المذلّه

خلّك عزيزٍ لا تخونك مخابرْك

مثل الجبل شامخ رفيعٍ محلّه

ومثل القمر بارق وكلٍّ يسامرك

ومثل الصقِر صيّاد صيدك تتلّه

محد يتلّك في شِراكه وياسرك

في كلّ وقت وْ كلّ دربٍ تدلّه

ومع كلّ ولفٍ في هيامك يعاشرك

يالعزّ لك سيفٍ على الذلّ سلّه

لا ينكسر سيفك ترى الذلّ ينحرك

ويالخير لك مبسم على الغير فلّه

لمّا يعَرف الغير قدرك ويشكرك

الخير ما ينفع لنفسٍ مغلّه

الغلّ طبعٍ لى نوى الشرّ يذكرك

يحشد جيوش الكره والغدر كلّه

ويبدا يحارب كلّ خير بْمشاعرك

احرص جميع الحرص للّي تعلّه

من خيرك اللي هو قراح لْعشايرك

والضاميَ اللّي ما يقدّرك خلّه

وأقعد مع اللي من خفوقه يقدّرك

هذي وصايا العزّ خذها مظلّه

لمّا هجير الذلّ يوجع نواظرك

قصيدة كمّل جميلك
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
78 مشاهدة

أهديتني حبٍّ سكن داخل الروح

عشت بْربيعه أعذب العمر ويّاك

دامك نويت تروح، بس قبل لا تروح

كمّل جميلك وأهدني قلب ينساك

محال قلبي تتركه ينزف جْروح

ويصبر له أيامٍ وينبض بليّاك

وشلون يقبل كلمة أبعد وبس روح

وياما سمع كلمة أحبك وحيّاك!

لا تظنّ قلبي طفل بمهاد مطروح

يكبر وينسى ما مضى من سواياك

من عقبكم لا شكّ ما فيه مملوح

يرضي غروري مثل ملحك وشرواك

لا ولّوا أهل الدار من غير مصلوح

يموت ورد الدار وتظلّ الأشواك

ويبقى غبارٍ يوصف الحال بوضوح

تخيّل أن الدار هذي حناياك!

وإذا بعد وصفي تبي تروح، مسموح

عسى السنين تنسّي القلب ذكراك

قصيدة الحذر
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
76 مشاهدة

ما كلّ من يضحك بوجهك صديقك

بعض البشر يا خوك بالحيل غدار

لى من لقى له عثرةٍ في طريقك

يطيحك فيها ويرميك بالنار

ولا كلّ من تحسب رفيقك رفيقك

وقت المطر، تلقاه زهرٍ ونوّار

ووقت الضما، تنشدْه ما بلّ ريقك

وعند العتب، يقفي ولا تلحق غْبار

خذ الحذر دايم بعزك وضيقك

كاس الخسارة ما تحلّيه الأعذار

ومن ما يطيقك، وا عسى ما يطيقك

ما ينقطع عند العرب حقد الأشرار

قصيدة فالك الغفران
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
76 مشاهدة

وش يكون الليل يا بدر بغيابك!

وش مصير الحبّ لو ندفن البسمة!

أشهد أنّ الدار تبكي مع أحبابك

كيف بس نرثيك يا مهندس الكلمة!

يا عظيم الشعر والحرف يزهى بك

يا بديع الرسم بك تنبض الرسمة

مدرستنا في الأدب ضيّ طلابك

مير بعدك كلّ بيتٍ غدى عتمة

كم على ذوقك ربينا وعشنا بك

ارتقيت بفننا ومستوى النغمة

كم على جرحك نزفنا وبأسبابك

السماء من حزنها تذرف النجمة

طول عمرك دارنا تسكن أهدابك

من هو كثرك شِعرها اقترن باسمه!

في كتاب المجد، عشق الوطن بابك

وفي مدى التاريخ لا شكّ لك بصمة

يا بو خالد ألف رحمة على ترابك

هذا أمر الله وراضين في حكمه

فالك الغفران وميمّن كْتابك

وفي جنان الخلد يا أمير لك قسمة

قصيدة توأمة روحي
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
76 مشاهدة

بنتقي لك أجمل أوصافك درر

وأطلق إحساسي على شعر ووتر

وأسبق اللحظة إلى الموعد وأقول

كل عامٍ يا قمر وأنتي قمر

تذْكري ليلة لقانا، تْذكري؟

قلت فيها يْحقّ لك تتكبري

أنتِ وردة عطّرَت كل الفصول

كل لحظة في عيوني تكبري

يا ما شلتيني من الهم العتيق

يا ما كنتي لي عن الضيقة طريق

ويوم أسافر في خيالاتي أجول

فيها طيفك كان لي نِعْم الرفيق

هلّت الدمعة على جور الزمان

ومْسحَتها يدّك بْلطف وحنان

رغم هذا، استمرت بالنزول

تشتكي، ليتك مسحتيني زمان!

يا عسى جرح العواذل ما يطيب

حبنا يا بنت شمسٍ ما تغيب

أنتِ عمري لو يقول اللي يقول

توأمة روحي وأنا أسعد حبيب

قصيدة خَلك قمر
الشاعر: سطام بن أحمد الحرابي سطام بن أحمد الحرابي
#العصر الحديث
#المملكة العربية السعودية
0
75 مشاهدة

خلك قمر، ما بك من القدر تقليل

عال المقام وكلّ عينٍ تعرْفه

وش هوّنك! كنك كما خايب الخيل!

ضعيف، وإن مرّه غريرٍ يعسفه

صمت الشباب وشيّبتك الغرابيل

واتلاتها ترضى من الحثل رشفة!

العاطفة خانتْك في غفلة الليل

أغشت على العقل وغدى سهل خطفه

هام النخل لو مال وش يعدل الميل!

وش يجبر الشامخ على كسر طرفه

من عاف شيء لله، عوضه بالحيل

خيرٍ كثيرٍ كايد الكود وصفه