فوق هام السحب ( الشعر الشعبي) على متن القوافي

‏اغيب لاكني مع الناس موجود
‏وعلاقتي بالناس جداً لطيفه

‏غضيت طرف العين عن كل منقود
‏وخاويت بيضان القلوب النظيفه

بقلمي

مؤمن بالقدر والصبر اتخاذي
‏مابعد ضيق الصدور إلا سعتها

‏وش يحزن خاطري والأرض هذي
‏كل حي ٍفوقها يرجع تحتها

....

جيت المكان اللي لنا فيه ذكرى
قلت اتسلا عن غيابك بذكراك

ماني لحالي فاقدك واتحرى
حتى المكان اللي جمعنا تحراك

....

‏ياحلو عز النفس لو كان يفقرك
‏ويامر ذل النفس لو كان يغنيك

‏احذر تواضع عند من لايوقرك
‏واحذر تكبر عند من كان يغليك

بقلمي

‏يالله ياللي بك مواثيق الآمال
‏ياخالق الدنيا ومحصي عددها

‏يامن سجد وجهي لوجهك ولا زال
‏يجني ثمار السجدة اللي سجدها

‏أنا بوجهك من عنى الوقت لامال
‏وشر القلوب المبغضات وحسدها

....

يارب وأنت بكل مافيني عليّم
‏سخر لي أصحاب النفوس الصافية

‏لو شحت ظروفي فلا غيرك كريم
‏وان جارت ذنوبي عساها خافيه

‏عن كل ذنب أستغفر الله العظيم
‏عن كل كسرة نفس أجر وعافية

....

‏لا تترك ضلوعي ويآكلني البرد
وأنت الدفا من ضمتك يحتويني

عطني يدينك عطر وأنفاسك الورد
وأعطيك قلبي يادفاي وحنيني

...

‏املا المكان بجمر شوقي و ادفيه
وأحس بإحساس الغلا مع طيوفه

من كثر ماحبه ومن كثر ماغليه
أحضن خياله واتلمس كفوفه

....

‏ياوجدحالي كل ماصحت لبيه
لبيه ياسارق غلا القلب كله

ماغيرك اللي شرع القلب بيديه
ولا غيرك اللي شد قلبي وتله

....

رسالتي لك...

لاتقهر أحد لتسعد نفسك
ولا تظلم شخص لتبرر اخطائك
حاول دائماً بناء سعادتك
بعيد عن الم الناس

بقلمي