فوق هام السحب ( الشعر الشعبي) على متن القوافي

مثل من يحجب بيده عن عيونه شعاع النور
‏انا وشلون بنفي فقدك وتأثيره وجوره

‏فقدتك كني أول من فقد غالي وعاش الدور
‏ولا احد قد فقد غالي قبله ويفهم شعوره

‏عبث تحضن خطاوي الدروب ودمعي المنثور
‏تطلعه ابتسامات الرضا والحب من طوره

‏كأني وان عرفت سرور قبلك ماعرفت سرور
‏او إن القلب زهّده الحزن واستكثر سروره
‏
‏اشوفك كل ماغنى على غصن الشجر عصفور
‏ولا عاد الشجر نفسه ولا غصنه وعصفوره
‏
‏يمر بعيني اشهی ماخلق ربي بدون شعور
‏صحيح إن القلوب جنود منهيّه ومأمورة

‏حبيبي مابقی دافع وسط بالي ولا لي دور
‏والارض اصلا كذا ولا كذا بالناس معموره

‏انا لو ذكرياتك ماتعمّر بالي المهجور
‏تعدّته الطواري من فزعها وانهدم سوره

‏على وجهك تحاسيف الزمان وصوتي المكسور
‏ياضيعة جرة انسامه من الصدر ومن كسوره

‏تركت من الجفا قلب يحبك راضي ومجبور
‏ولا ملله طول البعد منك ولا معي شوره

‏عسی الله لا يضيع لي سنين وجعلني مأجور
‏ولو ماتدمل اعذارك جروح القلب معذوره

‏احسك اقرب من اني اقول انّا ظلال وسور
‏واحس الأرض مادارت بعد عينك ولا دوره

‏ على صوره موقفني حنيني لي ثلاث شهور
‏وعيت لاتدور الأرض مادري عيت الصوره

.....

الاكتفاء من اركان الحُب حين تبلغ مرحلة من الاكتفاء حيث أن جميع من يمُر لايلفت الانتباه أعلم إن قلبك ليس مُلكك

‏يقول محمد المقحم :
‏تمر المره من عقبها كنّها رجال
‏ماوالله تحرّك شعرةٍ من شعر راسي

‏
وتقول ميلاف :
‏انت خليت الرياجيل في عيوني حريم
‏كن مافيهم مراجل ولا فيّ شهوه

في سكون الليل ناجيت علّام الغيوب
أسأله يربط على قلبي أسري في رضاه

ياتسابيح الدُجى ترجمي نبض القلوب
قد عزمت أسري مع الله وألبي ندائه

انطلقت أفزع مع الله في عز الدروب
واحتزم عونه وأواليه وأعادي عداه

......

ماحسبنا للزلايب ولا هرج الرخوم
خشمٍ نقدر جنابه وخشمٍ نلطمه

ومن علينا يحمل سلاح ويحرش خصوم
والله ان نسلب سلاحه ونخلع محزمه

.....

الناس تظهرها المواقف والأيام
والرجل تعرف قيمته من كلامه

رجلٍ يكفي فالمواقف ليا قام
ورجل جلوسه خير له من مقامه

.....

انا لك في نهار الشان درع وسيف ابوحدين
علينا الهقوه العاليا ولاخابت هقاوينا

.....

نضد الجمع ونضيم العدا ونخاصم الغاوين
ونتحدا الخطر وندوُس خشم الي يعادينا

.....

مافيه شيٍ يصير الا وله سـبه
‏والذيب عينٍ خلاف وعين قدامه

‏كم واحدٍ مـن رصاص القوم متنبه
‏ولاصابه الا الرصاص اللي من حزامه

.....

نبقى كبار وبيرق العز مرفوع
مهما يثيرون الصغار الزوابع

اهل السوالف كثار بكل موضوع
واهل الفعول تعدهم بالأصابع

.....

يالله ياللي فزعتك تكشف الضيق
في بحر عفوك ماتضيق المراسي

انا فوجهك من قليل التوافيق
ومن موقفٍ مايرتفع فيه راسي

بقلمي