فوق هام السحب ( الشعر الشعبي) على متن القوافي

‏هذي السعوديه ذرى عز وفخر
‏نحيا بظل الله وتحت ظلالها🇸🇦

بقلمي

‏يا الله يامن رحمتك مثل وصفك
يامستجيب لكل داعي دعاويه

حقق لنا كل الاماني بعطفك
وجودك اللي مال جودك يجاريه

يارب كل انسان طامع بلطفك
وكل من له حلم نفسه تساويه

يامن اماني كل واحد بكفك
يارب حقق من دعا لك امانيه

بقلمي

‏ليت الهموم اللي تجينا تولي
وليت الحزن يطري علا القلب ويروح

وليت المواجع بالحشا ماتضلي
وليت الزعل ياصاح مايسكن الروح

وليت السعاده في سمانا تِحلي
وليت الفرح يملا سكنا والاصروح

وليت الاماني بالبشاير تهلي
وليت الحظوظ تهب لنا كل مملوح

.....

‏الشوق مثل الموت نزاع للروح
ياخذ من اجساد البشر عافيتها

كنه شعور الطير لاصار مذبوح
يرقص ألم للروح بمفارقتها

وانا من الاشواق عايش بلا روح
والروح طارت في سما عاشقتها

حتى عيوني تشكي الشوق وتنوح
ودموع شوقي للجفون اغرقتها

.....

‏في ذمتي اغليك واغليك واغليك
وحبك سكن مابين قلبي والاحساس

ماشفت غيرك لجل اعزه واخليك
اعميتني ياروح قلبي عن الناس

سكنت قلبي غصب عني تماتيك
من غير خلق الله تربعت من ساس

ياجعل قلبك في هوى العشق يبليك
وتموت في حبي على ساير الناس

.....

‏نمشي على بيض النوايا والاسباب
لاهمنا المقفي ولا من جفانا

لانسأل الواشي عن العيب لاعاب
ولا ننشد اللي خاننا في قفانا

بعض الصداقه مثلها مثل الاسراب
تغري نظرنا وقت لحظه ظمانا

وإن جيتهم ظميان صارو لنا اغراب
حتى قريب الناس ماعاد لفانا

.....

‏ناديت لك من بين الايام وين انت
محتاج أفضفض لك حديث المحاني

تعال وابعدني من الحزن لاهنت
ماغيرك انت اللي يلطف زماني

ياحب ضايق خاطري وانت مابنت
وشوفك علاجي لو مجرد ثواني

يامن بعشقك وسط قلبي تمكنت
ومحبتك حلت بداخل كياني

.....

‏اللي يعبر وغيره ملتزم بالسكوت
احيان صمتك يهد الحلم ويحطمه

اهم حاجه شعورك فالزمن لايموت
عبر عن اللي يجي فالنفس لاتكتمه

.....

‏ماكنّك إلا بدايات الشتا في السّنين
‏ مهما تتكرر لها التقدير والمَرحبا

.....

ترى مساء الخير مثل البشاره
لاقلتها للي تعزه وتغليه

ولا قلتها للغير ماهي خساره
تكسب ردود الخير بأجمل معانيه

.....