اخترنا لكم

ياهن لو عندك مفاتيح الارزاق
ان كان تقفل باب الارزاق عنا

والرزق عندالله وتيسير الاوفاق
هذا اختصار العلم منا ومنا

حنّا يكفّينا المعرفة والأخلاق
والدين والحكمه وهيبة وطنا

.....

الرزق بامر اللي على العرش مرفوع
الله عظيم الشان جزل النعايم

والذيب يصبر كل ماحده الجوع
ويضرب تخاتيخ الخلاء والخرايم

وكثر العتب واللوم والهجر ممنوع
بين القلوب إللي بها الحب قايم

والسب مايبني للانسان مشروع
واهل الشتايم يحصدون الشتايم

.....

استر على مابيننا من مراسيل
انا قطت الوصل مع كل الامه

اودعك بالمسك والورد والهيل
موفقٍ مع كل درب ٍويمّه

.....

زين المكان بطيب من شاركك فيه
وطيب الديار بطيب منهو سنكها

وليا تغيّر قلب من كنت تغليه
بئس القلوب وبئس منهو ضمنها

كل البشر ماكل شخصٍ بترضيه
بعض النفوس الله يخارجك منها

.....

مدري شبلاهم ربعنا مايردون
رد السلام بشرعهم يمنعونه

متعالي المجمول طاغي ومزيون
ويشوفنا في عينه اليوم دونه

لا ياسمي الوالده ليه هالون
مانستحق ياشوق منك المهونه

ليتك تشوف بداخل الجوف مكنون
وتشوف حبك كيف ثبت ركونه

حبي تعدى حب ليلى ومجنون
قيس ان جلس وياي هانت جنونه

.....

كل بنتٍ قطعة من قلب ابوها
دمعها يجرح وضحكتها تداوي

ذي حقيقة وانشـد اللي جربوها
قبل تقدِم للزواج إن كنت ناوي

‎.....

بيض الله وجه صكات الليالي
بينت معدن قليلين المروه

الله اكبر كم واحد كان غالي
إنقلب ميزان قدره من علوه

يوم جاء للموقف الحاسم مجالي
بان راع الزيف والوجه المشوه

.....

من لايثمن جيتك لانصيته
أحذر تحث خطاك يمه وتنصاه

جنب طريقه لاتجي يم بيته
خله على يسراك ومش وتعداه

للي ليا منك نصيته وجيته
يشوش ويرحب ويضحك محياه

أتلى العهد بالهم ساعة لفيته
ألله يطول عمره وعمر شرواه

.....

امك وابوك اللي من الصغر ربوك
أحـرص على تقديرهم واحترمهم

يبـغون مـنك المنفعه يــوم جابوك
لاتجحـد المعـروف و الخير منهم

انته لهــم يا طيب الفـــال مملوك
أحـــذر زعلــهم وادفع الشر عنهم

كم مرة في وسط الاحضان حطوك
من شـــان تفــرح لو تكـــدر زمنهم

.....

الوقت هذا طبعِه أقشر يروّع
الكذِب له جمهور والصدِق مكبوت

والكفو من ماهو يشوفِه ملَوّع
صار الخبِل له دور والعلِم مثبوت

وقتٍ يهَمّشْ فيه شيخ ومطوّع
ويمجّدون الناس بالكذِب سربوت

.....