فوق هام السحب ( الشعر الشعبي) على متن القوافي

قھوي مزاجي بنظراتك وقھويني
وانا بقھويك شعرٍ عذب و محــلاّ

كل المشاعر على دربك تودينـي
ولغيرك الصدر مارّحب ولا هــــلاّ

.....

‏اتبختر وانا المثيره بين كل الحضور
‏واستفرد بالقصايد واغِري أوزانها

‏واطغى على الناس وامشي بالدلع والغرور
‏انا من اكبر حمايلها وشيخانها

‏عيوني اللي تحلى بالتعب والفتور
‏مدري متى الله يخفف من طيشانها

‏غيدٍ ارد المعيف من زمان الدهور
‏للواحه اللي تهب النود باغصانها

.....

‏مالله كتب لي فيك حظ ولا نصيب
‏الواقع أصدق من يا ليت وربما

‏حتى لو إن إحساس قـلبي ما يخيب
‏سفك الشعور أشد من سفك الدما

‏والغيمه اللي تاخذ شوي وتغيب
‏ما تغري ألا الميّتين من الضما

‏أحيان حتى اللي تحس إنه قريب
‏يمكن يكون أبعد عليك من السما

.....

انت الذي أعنيه وسط الدواوين
وانت الذي خليتني صرت شاعر

وانت الذي وسط الكبد والشرايين
وانت الذي في الروح ناهي وآمر

.....

مرات الإنسان يبغى الصد والابتعاد
عن كل الاشياء حتى لوهو يحبها

.....

‏فقدتك وأدور لك من ايّام واحاتيك
وغربت غيابك زودّت غربتي غربه

امر الدروب اللي تمرك وأفكر فيك
مثل ما يفكر ضايع الدرب في دربه

.....

يالبيه ياللي*من جمالك تغار الحور
وطاحت جميع الحور يابنت من دونك

عسى من يزعل قلبك انتي يجيه الجور
وعسى فدوتك ناسً غدو مايحبونك

جمالك جعل كل العذارى وراء السور
لانهم اساساً في الزمن ما يساوونك

.....

لاتقول ان المعاصي شي عادي
المعاصي شر تخْذل من مشاها

من فعلها هايمٍ في كل وادي
مايحَصّل كود نقصٍ من وراها

والسبب شيطان يبغاله جهادي
خل نفسك فوق وارفع مستواها

لاتطيع ابليس دامه لك معادي
وامنع النفس الشقيه عن هواها

.....

تمونين يا بنت السحايب على الروح
لو كل ضـلع ٍ فالحشــى تكسـرينـه

خطاكٍ لو تخطين منســي مدموح
ما اعـاتبـك في خــافق ٍ تـملكيـنـه

انتــي دواء قلٰبٍ من الوقـت مـجروح
يفـداكٍ معلـوقي ولو تـجـرحـينـه

‏ما للغلا غير القلوب النظيفه
‏اللي على صدق المعاني يحبون

‏الود صادق والمشاعر عفيفه
‏ولآغبت عنهم للعهد مايحيدون

منصور الحبابي