اخترنا لكم

يالله بـحظً يجمـــل وذكرً ما يغيب
‏مانبي إلا الوجه الابيض وستر العايبه

‏دلنا حسن النــوايا و توفيق النصيب
‏واكفنا من شر بعض الظنون الخايبه

.....

وبعض القصايد على وزنه وقافيه
‏تبدأ و تقضي ولا ادري وين معناها

‏وبعض القصايد تقل كبسة عزوبيه
‏أما نقص ملحـــها والا نقص ماها

.....

‏اعتزلت الناس وابشرك طيّب
‏ما غبطت اللي ورا الدنيا يطارد

‏جعلني ما اسوم وجهي عند خيّب
‏المقابل شين والترحيب بارد

‏الرفيق اللي محاضيبه قريّب
‏ما يوردها عذيّات الموارد

‏محسنٍ ظنّي وحسن الظن طيّب
‏غير في بعض الامور الشك وارد

.....

‏ربتني الدنيا على الحمد لله
‏عندي يقين وعنده الامر كلّه

‏على الطريق اللي عيوبه مزاياه
‏ما كنت اعقد الحبل عشان احله

‏يا ما رميت الحزن للا مبالاه
‏ويا ما صنعت الضحكة المسفهلّة

‏دليلي انّ الحظ لا ضاع بالقاه
‏احساس والاحساس سيد الادلّه

.....

‏يانجد لو صيفك عجاج وعواصيف
‏غلاك يبقى في الشرايين دارج
‏
‏ لو كان جوّك حر في لاهب الصيف
‏نصبر على الملهاب والله يخارج

.....

اكثر ما يضحكني بعالَم تويتر
اللي اشترىَ له بالريال متابعين

مهما يهايط حالته في توتر
ومتابعينه لو دفَع متناقصين

مثله مثِل بعض الصور بالفلاتر
وضع المفلتر والأصل متناقضين

النجم العالي

انا بفضل الله تراني من النوع
اللي يموت ولا يبيح كنينه

الفرحه اعرفها من اسبوع لسبوع
واتصنع اني عايشٍ في سكينه

ما تِسمن الشكوى ولا تغني الجوع
شكوى لغير الله بعدها غبينه

.....

لاصارمالك من وراء الناس حاجه
مالك ومـال الخلق واللي يقولون

ريح ضميرك واطلب الله ونـاجه
وخل البشر لله هـو خالق الكـون

سعود العتيبي

وجيه الردى ماتستحي من وجيه الطيب
بعد ما بدى الماقف وكل ن بدى وجهه

وجيه نقلطها على الطيب والترحيب
ووجيه نعرّضها على الصد والسفهة

لاشك الوجيه اللي كساها الردى والعيب
ترى ذكرها شرهة و تقديرها شرهة

اعد الصراحة والبشر مخطي ومصيب
ولا نيب راعي هرجة ما لها وجهة

علي الشنّاني