فوق هام السحب ( الشعر الشعبي) على متن القوافي

‏لا تقارن مع قصير الشبر شبرك
‏ولا تنازل عن شيمك ولا تراجع

‏ولا تواضع للوضيع يضيع قدرك
‏منت مجبورٍ على بعض التواضع

.....

‏ترى الجمايل في بطون المجانين
‏أخير منها في بطون الصحاحي

‏على الأقل لو أنكروا فعلك الزين
‏لك عذر ماتشره على غير صاحي

.....

‏راعي الردى لا تجبرونه على الطيب
‏العبد ماله غير ما الله كتب له

‏أشهد شهادة حق مدح الردي عيب
‏مثل الصلاة اللي على غير قبله

.....

‏اليوم كلَّ علينا يفلت لسانه
‏ومن الكلام العوج لا تآمن الأبلم

‏مبادي الناس والأخلاق خربانه
‏نمشي بجنب الجدار وليتنا نسلم

.....

‏مقام الفتى في منصب العز ساعه
‏ولا ألف عامٍ يصحب الذل جانبه

‏ترى العز لو فالنار زينٍ على الفتى
‏والذل لو بالخلد مازان صاحبه

.....

‏ما شبعنا غير من أكل القهر
‏ولا روينا غير من هل من مزيد

‏حسبي الله فيك يالوقت الغبر
‏تضرب الطيب بيدٍ من حديد

.....