ديوان قصائد لشعراء المملكة العربية السعودية (متجدد)☘️☘️

قصيدة يا قصيدي تجمل
الشاعر: متروك حاوي العنزي متروك حاوي العنزي
#العصر الحديث
#المملكة العربية السعودية
0
51 مشاهدة

يا قصيدي تجمل مفرداتك ثقال

خط أجمل تعابيري بخد الطروس

هاجس الشعر جاله وسط صدري مجال

بعد طولت غيابه حضرت به هجوس

أعصفت بي عواصيفه يمين وشمال

وكنت متوقع انه ما يجيني فروس

لين جتني طوابيره وحان النزال

وردن في مساء ليل(ن) طويل(ن) عبوس

صارفيه الطراد وكثر فيه الجدال

بين ماض(ن) سعيد وبين عصر النحوس

دارت براسي أفكاري على كل حال

كني الزير أبو ليلى بحرب البسوس

قلت ابضرب بسيفي بس روس الجزال

الهزيلة لهلها ما توقي ضروس

فارس(ن) ما يهاب وضاري(ن) للقتال

وشاعر(ن) للجمال وفاهم(ن) للدروس

مثل ما به جبال هناك تلقى رجال

قمة المجد تشبه للجبل لو تقوس

ما تجي بالسهولة دون جهد(ن) محال

كم فارس تجندل دونها بالطعوس

ونايف الي رقا في راسها بعتدال

وأحتفل فوق قمتها بعيد الجلوس

أبو سلمان نال السامية بالكمال

مثل ما نال شعري به تجلا النفوس

قصيدة ليالي


متروك حاوي العنزي

#العصر الحديث #المملكة العربية السعودية

0

50 مشاهدة


يا ليالي بلغيه أني احبه يا ليالي
صرت اشك انه نساني صار يتكرر سؤالي
أحرقتني منه نار الشك أنا يا ويل حالي
ما بقي عندي حلول إلا تركه لك يا ليالي
أوانا خوفي وشوقي صادروا كل حتمالي
جايز إني يا ليالي صرت في وضعا خيالي
بين نار البعد والحرمان والحب المثالي
استقر الوجد ولأشواق في صدر الشمالي
يا ليالي اسأليه وليه يتجاهل سؤالي
صار منه الاجتماعي انطوائي وانعزالي

قصيدة أقاسي زماني
الشاعر: متروك حاوي العنزي متروك حاوي العنزي
#العصر الحديث
#المملكة العربية السعودية
0
50 مشاهدة

أقاسي زماني لجلكم ما حسبت أحساب

قاسيت لجلك قاسي الوقت يا قاسي

اضحي بنفسي وانت تعرف من الأسباب

وأنا عارف(ن) كل الذي دار بأحساسي

ولولى الأماني ولأمل كان عنكم تاب

قلبي وعزيته مثل ساير الناسي

وقلت اترك المخلوق لا تصادق اللعاب

ترى مصادق اللعاب يوريك الأتعاسي

ولكن احبك وانت تعرف مدى الأحباب

دخيلك من الفرقا ترشيبت راسي

إذا كان بك رحمه لقلبٍ بحبك ذاب

تذكر حبيبك كان يا صاحبي ناسي

قصيدة اجتاحني جيش الهواجيس
الشاعر: متروك حاوي العنزي متروك حاوي العنزي
#العصر الحديث
#المملكة العربية السعودية
0
50 مشاهدة

أجتاحني جيش الهواجيس وضنون

من كل فج اسرابها هاجموني

وقت المسا تبني لها عندي احصون

وترسل علي قواتها يأسروني

مع الغياب وعتمة الليل ياتون

في موعدٍ عن صاحبه يسئلوني

واغيب عن واقع حياتي على هون

لوما احساسي كان مايطلقوني

أسيرمن دون العقل كان تدرون

والناس ماتعذر ولايرحموني

الشاهد الله فيكم اصبحت مفتون

حتى غدافيكم هيامي جنوني

اهيم واسري بين الأشواق وشجون

الليل كله ساهره ياشجوني

بعدالأسرمن هاجسي لوتطلون

فرحة غرير بشوفة امٍ حنوني

بعدالغياب وشافها صبه اجنون

وكل ممسكوا كفه يقول اتركوني

وهي قلبهامثله بعد حيل محزون

كم جرحوها خايبين الضنوني

اناترى مثل أشتياقه لها اكون

وهي عارفه كل الغلا ولاتهوني

عندي تساوي بالغلا ماحوى الكون

هي ملهمة روح الشقي سا محوني

انا بهواها هايمٍ مالي العون

همت بجمال الفاتنة ياعيوني

الي غلاها أثرابجوفي أطعون

حتى بديت اشكي مدامي طعوني

يالي تلوموني كفا لاتلومون

ولابعد لوموا علي واعذلوني

ماني بسامع وأعلموا لوتسبون

من معدنه كلٍ كلامه يكوني

من الجوهرالجوهرمصفى ومكنون

ومن الذهب تلقى الذهب كل لوني

ومن التنك تلقى مصدي ومدفون

الناس معدن كل من له زبوني

أجتاحني جيش الهواجيس تكفون

ياعاذ ليني مالكم في شئوني

قصيدة يالي ناسيني
الشاعر: متروك حاوي العنزي متروك حاوي العنزي
#العصر الحديث
#المملكة العربية السعودية
0
48 مشاهدة

يالي ناسيني ما تفكر فيني

يمك تفكيري عيني تنظربك

قرب وسلم شفني متألم

مقدر اتكلم أبي اجلس جنبك

قربك يشفيني وبعدك يظنيني

نار وتكويني يا مقسا قلبك

بعدك أفناني وحطم كياني

وآنا حياتي تزهر بقربك

إن قلت احبك أكثر من روحي

يا روح روحي والله أحبك

حبك أماني وانت الأماني

ولاحب تاني ويلك من ربك

بالله فرحني قلها وريحني

كلمه تفرحني من بوئك تربك

تربك عدواني وتطرد أحزاني

وتبقى الأماني دربي ودربك

قصيدة سريت لك
الشاعر: متروك حاوي العنزي متروك حاوي العنزي
#العصر الحديث
#المملكة العربية السعودية
0
49 مشاهدة

سريت لك والجسم في مجلسه ضل

والي بقربه جالسٍ ما درابي

ما يعلم أني رحت ابشوف لي حل

ولا يدري أني سارحٍ في عذابي

هو يحسبني ساكتٍ لجل يكمل

سوالفٍ يسرد بها في غيابي

يشوفني منصت لهرجه وطول

يسند على جسمٍ كسنه أثيابي

يبي الجواب وشك بسكوتي الكل

ونادا بصوتٍ ردليه صوابي

صحيت وأنا طالع الناس واسأل

وقول كمل يا عريب الجنابي

قال انتهت قصة بو ليلى المهلهل

تبيني ابدا بعنترة او ذيابي

قصيدة قال اعتذرلك
الشاعر: متروك حاوي العنزي متروك حاوي العنزي
#العصر الحديث
#المملكة العربية السعودية
0
44 مشاهدة

قال اعتذر لك عن خطا غير مقصود

قلت الخطا لو كان مقصود مسموح

يا من بقلبي لك وطن ما له احدود

ولك فيه حراسا معك وين ما تروح

والي خلقك وصور اعيونك السود

انك عديل الروح إذا منت بالروح

واكثر بعد يمعادل روحي وزود

اكتب لك أشعاري من القلب وأبوح

يا فرحة أيامي إذا كنت موجود

خل العيون اتناظرك نظره وروح

إن غبت عني باب الأفراح مسدود

أبقي حزين اويل عيني من النوح

قصيدة الكرز والتوت
الشاعر: متروك حاوي العنزي متروك حاوي العنزي
#العصر الحديث
#المملكة العربية السعودية
0
40 مشاهدة

سمعت القوافي رايعات الصدى والصوت

حسب ما نظمها أسياد شعر النبطية

وسافر بي المعنى عن العالم المكبوت

إلى عالم ما كبلته الخصوصية

ورى ليل وأسوارٍ بها العاشق الممقوت

يحدد مساره في ربوعٍ ظلاميه

عبرت المحيط وحط بي مركبي بسكوت

وأخذت أتفكر والمناظر جماليه

قطفت العنب من دا ليه والكرز والتوت

وأخذت العبير من الزهور الصباحية

وجمعت الآلي بعد ما عقدها مبتوت

بسلك الحرير ونظمها صار بيديه

لواسع خيالي يحضر الول والياقوت

على شاطيٍ شمسه سماها ربيعيه

تحرك بي الهاجس على جمعها المشتوت

أنا هاجسي يحوي علوم أسطوريه

بجمع الشتات لمثلها عالمٍ مبخوت

لأمره تحضرها الهجوس المدارية

إذا صارفي راسي هدف جابته محتوت

تجيبه على مآبي بسرعة خياليه

ولا لوم جاسر في جمال سكن بيروت

لقاله شبيهٍ بالحدود الشمالية

لك الله كم درة لها بيتها تابوت

تساوت مع الموتى ولأكنها حيه

ف تبا لواليها حفر قبرها المبهوت

تشدد بحكمه لين ولت هبائيه

قصيدة مادام حر وعندك أجناح يرف
الشاعر: متروك حاوي العنزي متروك حاوي العنزي
#العصر الحديث
#المملكة العربية السعودية
0
41 مشاهدة

مادام حر وعندك أجناح يرف

طليق والسبعة بريشك سليمة

أكفخ بجنحان السعد دامها صف

تتعب وتاصل لك منازل عظيمة

الخوف ما طول عمر وانت تعرف

والنصر ماهو مثل طعم الهزيمة

اغنم زمانك قبل عمرك يطرف

ترى العمر مكسب لك وذات قيمة

وخلك لطيف وحسن خلق وتصرف

ولا تمشي إلا مع رجال حشيمة

على الرجال اللي تنومس تعرف

تكفيك عن عرف العقول السقيمة

قصيدة ناس تحملنا حقوق ومشاريه
الشاعر: متروك حاوي العنزي متروك حاوي العنزي
#العصر الحديث
#المملكة العربية السعودية
0
40 مشاهدة

ناس تحملنا حقوق اومشاريه

وهم ما لهم فينا مشاريه وحقوق

يبون منا كل شيء نلبيه.

وحنا مطالبنا كبار وبلا ذوق

بشت الميانه فوقنا الشيخ راميه

اذكره كانه نسى الغدر والبوق

بذكره كانه نسى فعل ماضيه

ذكرى بها تحذير مع كل طاروق

من حاول ازعاجي ونا كنت ناسيه

ما يستريح بمرقده لو طلع فوق