فوق هام السحب ( الشعر الشعبي) على متن القوافي

يالله دخيلك من المنقود والزله
والناس ماهيب لا ترحم ولا تاوي

ياكثر ناسٍ بلا مذهب ولا مله
تترك طريق الصلاح وتتبع الغاوي


غازي الخراص

‎

الصمت حكمة لايغرك لسانك
كم هــرجةٍ تجلب لهلها نقــادة

اعرف خراجك ثم حدد مكانك
فـ الهرج والا الصمت تلقى اشاده


علي الشريف

‎

ياصاحبي وشفيك قلّي عسى خير
تشكي وانا خابرك رمز الشجاعة

ان كان حاديك الزمن والمقادير
الصبر للرجال يعطي مناعة

اسمع وخذ مني نصيحه وتذكير
ذرب الكلام اللي يفيدك سماعه

صواديف الدنيا ورود ومصادير
وافضل كنوز الوقت كنز القناعة


......

تضيق فيني هالحياه الوسيعه
لا شفت لي طيّب عياله تردوا

المشكـلة و الكارثـة و الفجيعه
ان كـنت متجّـمل بعالم و صدوا


عبدالله دليهي

اليا أذن المذن تهيّا للصلاه
والله ماتلقى خير من تاخيّرها

قد ماتوا اللي يستحقون الحياه
يعني بتبقى حي دور غيرهّا


خالد بن مبارك

من لا إستشارك لا تبدي له الشور

ومن لا يودك نور عينك فراقه


الشاعرة الدقيس الصلبية

الـمـراجـل كايده عـزٍ لـمـن يجمعها
ماجمعها الا ابلجٍ لاجا اللزوم يجمل

والـمراجل بنت شيخٍ والكفو يطمعها
والـردي عزمه ضعيف ولاهومتحمل

الكـفو تـندى يمينه والـردي يزمعها
والردي من كثر مايقبض يديه اتنمل

ومن شهرذكره يجيله سمعةٍ تسمعها
مثل نوٍ زابـرٍ ان جاد ولاهمل


فيصل ابن ظهيرة

‎

حنا عزاز ولا نحب التخضاع
والله خلق فينا الكرامه جبله

نكره وجيه الكبر في كل الاصقاع
والكبر يرخص كل نفس تشله

من عاش عمره للمخاليق تباع
يشرب فناجيل الغبن والمذله

وراع المعزه لو من الوقت يلتاع
يعيش شامخ ما انحنى غير لله


خليل بن هدلان

احذر من اللي يخلط المزح بالجد
اللي على ماقيل سارق ومزاح

حده على القصيا ورده ورى الحد
واقطع علاقاته وقل هم وانزاح


عبدالله الطلحي

‎

الحياة جـهاد ودروس وعبر
والحظيظ اللي طلع منها بخير

قول للي مابعد عنده خبر
لو يطول العـمر ماتصبح كبير

ماكبرت ان كان عقلك ماكبر
الحـقيقة غير والاوهـام غير

من جهل فن التغافل والصبر
لو يشيٍّب عارضه يبقى صغير


عبدالله الطلحي

‎