فوق هام السحب ( الشعر الشعبي) على متن القوافي

الصبر حكمه عظيمه والجمائل كنوز
والناس للناس يبن الناس في كل حال

وإهمال امة محمد للقيم مايجوز
والفانيه فانيه مابعدها إلا الرحال

....

مسّنا الضر وانته ذي ترانا وتنظر
يا مجيب دعوة المضطر عند الضروره

رحمتك قل لها تبدي علينا وتحضر
غيرها قد حضر ما فاد واجدى حضوره

....

ما بقى لك في مشاويري مسافه
اعتقد حنا وصلنا لـ الأخير

الندم والعذر ودموع الحسافه
مالها قيمه بعد موت الضمير

البحر هادي وتغرينا ضفافه
بس لاهاج البحر موجه غزير

خايف من البُعد لا لا لاتخافه
لاتخاف البُعد وأحبابك كثير

اشكر إحساسك على قِلّ الكلافه
يا كبيرٍ طحت من عيني صغير

....

ما بقى شيٍ عن الماضي ما قلته
والعرب ما تجهل ألا من جهلها

يِعرف التاريخ وتميّز شجرته
مثل مايِعرف وعر نجد وسهلها

ماتَعلوى قيمتك مهما حفظته
حتى لو تاريخ جدك قد دهلها

لاتماري غير في فعلٍ فعلته
الفعول الاوله تبقى لاهلها

....

في كل حاجه لي قرار الا انت مالي بك قرار
أفرغت لك قطعة من اقصى الروح محد طبها

فأن شفت روحي تنتظر لقياك وتموت أنتظار
خذها بيدها واقفل عيونك عليّ وخبها

ما اعاد ابي من لذة الدنيا بياض ولا سمار
غير أنت يا أخر من تعدى فالحدود ونبها

....

ودعتك الله لو على قلبي اخطيت
وحاربتني من دون ذنب وخطيه

احسبك تذكرني اذا اصبحت وامسيت
واثرك على فرقاي نفسك هنيه

الله اكبر كيف عني تخليت
من بعد ما علقت روحي البريه

وش غيرك وش بدلك ليه صديت
وانت الذي بالقلب نبض وهويه

من هو بقى لي بعدما عني اقفيت
وقدمتني للحزن اثمن هديه

....

لاتنتظر مني عذر وانت غلطان
كثر التمني ما يجيب الاماني

ما افكّر اغيّر بنفسي على شان
انسان ما غيّر بنفسه عشاني

....

مابين خوفي من الدنيا وخوفي عليك
ضيّعت عمري مابين اقفي او اتبعك

ماني بـ خايف توادعني وانا محتريك
خايف يديني تخون احساسي وتوادعك

عقلي يبي يبتعد عنك وقلبي يبيك
ومابين قلبي وعقلي ماقدرت اجمّعك

تبي الصراحه تعبت اعاتبك واشتكيك
تعال قلي احبك خلني اسمعك

....

العذر ما ينفعك مهما تعذرت
كبر الخطا نزل بعيني مكانك

لا تطلب وصالي تراني تكدّرت
ماعاد أبي قربك وطاري حنانك

أنا متغير صح لانك تغيرت
ارجع مثل ماكنت وأرجع عشانك

....

‏بعض التسامح والتغافل رخامه
من كلمة اللي لا مراجل ولا اسلوب

احيان امشّي العايبه بـ ابتسامه
واكسي جسدها ثوب لو مالها ثوب

واحيان اقومها عليهم قيامه
الردع في بعض الرياجيل مطلوب

....