فوق هام السحب ( الشعر الشعبي) على متن القوافي

أغيب لكني مع الناس موجود
‌‎وعلاقتي بالناس جدا لطيفه

‌‎غضيت طرف العين عن كل منقود
‌‎وخاويت بيضان القلوب النظيفة

....

‌‎

‏الله يحيّي من يشـرّف حسابي
‏بمتابعـه والا بلايـك ورتويـت

‏فتحت قلبي قبــل مافـك بابي
‏على اعتبار انا جماعه واهل بيت

‏ناسٍ يعرفون السنع والصّوابي
‏وافعالهـم ليّـه على ماتمنيت

‏يفداهـم اللي في غيابي حكابي
‏نسي مخوّتنا وانا عنه صدّيت

بقلمي

‏الحظ ماهو حظ من يملك المال
‏الحظ حظ اللـي تمّسك بدينه

‏الخير في قلبه توّثق ولا زال
‏وبعد رضا الله مرضيٍ والدينه

....

رح مراح اللي من كبار الخطايا معفي
‏لا تقول اخاف نظرات العرب وألسنها

‏انت حبك والله انه مثل نقطة ضعفي
‏حاجةٍ مهما حصل ماني مسولف عنها

....

‏يالله لاتقطع الاخبار من يمه
اللي ذبحني وغربلني وعناني

مايسعد القلب لين يقول من فمه
انا بخير وعلى شوفتك ولهاني

....

يالطيف الروح بعدك علي سم ٍ ذحاح
ليت نظراتك تعلمك عني بالصحيح

ياقراح البيض كان البني فيهم قراح
اشهد ان زولك مليح ٍومنطوقك مليح

كل شي ٍ قد جمعته على الدنيا وباح
غير حبك ي اريش العين عيّا لايبيح

....

البدايات
لو قالو الناس لك يومً ورح عش بـه
حذفت عمري وراي وجيتش مسير

العتاب
يالهنوف اللي غرامش ظلم خافي ربش
لاتعزويت بـ غلاش ولا نهض بش ريشي

البعد
ابي شوفتك من دون موعد ولا تنسيق
لو انك بين اقوى الرياجيل وانشطهاا

الشوق
ياطيب معك الملااقا والوصل والسممر
ويذعن لك الشوق من راسه الى كاحله

النهايات
ياريوف ليل الموادع دمع والا سهر
لونها بختياري مـا تخيرتها

-محمد ابن الذيب

ودّعوني كل مايسرق الشمس الغروب
المسا يحتاج عُزلة ونظرة عن كثَب

اتركوني كلّي بـ صوب والعالم بـ صوب
وارفعو عن طيش الاقلام والفكر العتَب

هاجسي كنّه يدور على باب الهروب
ما يريّح لين ما ألقى على المطلع سبَب

عاد انا اللي كل ما طالت طوال الدروب
ما تحد ركاب صبري على ثني الركَب

كل ماعيّت تهيّا تباشييير النصوب
اتبسّم لـ المقابيل واصبر واحتسب

وأتغنّى فـ المواعيد ياخضر القلوب
لين اقرّب كل صدفة يميّلها الطرب

ياهنوفٍ دونها العمر ماهو بـ محسوب
الزعل تبّت يدينه وما جابت وتبّ

أقبلي مثل الهمايل على القاع الجدوب
وأوقفي لين أسرق النوم من شّط الهدب

وانثني مثل الخزامى ليا هبّت هبوب
وإثبتي مثل المواثيق مابين العرب

وإقلطي لاجابك الشوق فالصدر الرحوب
وهزّي جذوع القريحه تساقط لك كُتب

وعاتبيني كان ما ألبستك من الودّ ثوب
وإعذريني لو تماديت في ساعة غضب

والله إن ماني على كيّة الحب مْغصوب
مير ماعيّنت مثلك على الكون الرحب

لك كلام اعذب من الما ولك صوتٍ عذوب
يشهد الله كنّه العافيه عقب التعَب

ولي خفوقٍ عن محبّتك عيّا لايتوب
جنّته وصلك وفرقالك سوء المنقلب

....

مانيب مستغرب عليك اللين والعود الدقاق
من يوم يومه عن نسيم الشوق ماهو فـ مْعزل

مع إن ما باقي من دروب الغرام إلا الفراق
لازال عودك في يد الغربي وقلبي لم يزل

متعلّق من أول لقا وأول عهد وأول عناق
بالكلمة اللي يوم أحايلها من لسانك تزل

ماكنت ادور من يرجعني لنقطة الإنطلاق
حتى لو إني شوفة عيونك حزين ومنعزل

أنتي عذية والعذية والمطر على وِفاق
وأنا بدويً وين ما هل المطر شد ونزل

إن وقفت في وجهك الدنيا على ركبه وساق
أنا على استعداد اولف لك على الجد الهزل

أهم شي المبسم المعسول منطوق ومذاق
مايصبح إلا من خيوط النور يسحب ويْغزل

ما سوّلت لي نفسي الهجران من ضيق الآفاق
معاك ماتفرق معايير المديح من الغزل

ليا مدحت انتي تحت هيبة متيّهة النياق
وليا تغزلت انتي إعجوبه وانا شاعر جزل

لاتكبرين ويستريح العقد للجيد الرقاق
واكبر وانا مابعد هنيته على طيب النزل

الحُب تنكره القلوب السود من كثر النفاق
ولا القلوب الخضر عايشةٍ عليه من الازل

....

قال وشلون القصيد وسال قلبي من مقره
وأنا شاعر ما يطيع الناس وأحساسه يطيعه

قال كم مره تعلقت بـ حبيب وقلت مره
أنت لاقبلك ولا بعدك وصال ولا قطيعه

ياحبيبي والطريق اللي خطاوينا تمره
سجتي فيه ومشاويري معه صارت طبيعه

ياحبيبي والقلوب العاشقة ماهيب حره
لايموت من الدهر قلبي وضحكاتك ربيعه

يابعد من حط في قلبي هداياه وصوره
وش تبي في الضيق وعيونك خلقها الله وسيعه

ليت ما لاقدامنا على خطوط الارض جره
والاماكن مالنا فيها شفيع ولا شفيعه

من جفيته عقب ساعات الوصال المستمره
بيعرف كيف القلوب تشيل ما لا تستطيعه

مابقى الا الذكريات الماضية حلوه ومره
أشتر اللي تشتري منها وبيع اللي تبيعه

....