فوق هام السحب ( الشعر الشعبي) على متن القوافي

الشتاء واليل موحش والشجر صوته حزين
من ورا الشباك عيني تعكس انوار المدينه

الـشـوارع والامـاكـن كلـها اكتضت حنين
لك شعوري لو وصفته فوق ماتتخيلينه

....

‏ياقلبي ادري داخلك شي حساس
لاباس وان كانت جروحك كثيره

حزنك وضيقك وانعزالك عن الناس
صدقني انها بعض الاحيان خيره

....

معك معك ياجناح الليل خذني معك
باسري معك طالما همي ملأ مخدعي

ليت انت ياليل تتكلم وانا باسمعك
عساك في حسرتي هذه تفضفض معي

احترت ياليل كيف احويك واستجمعك
لاطاب لونك ولا صمتك صفد مدمعي

....

يا أخر الليل عطني العلم من بدري
‏وش انت ناوي ترجع لي من الذكرى
‏
‏ان كانها حزن فأنا ممتلى صدري
‏وان كانها خير يمكن ضيقتي تبرى

....

ياليل خبرني لماذا انت عاتي
تفرض عليا ليش حضر التجول

وليش خاصم نوم عيني سباتي
وامسي على باب الكرى في تسول

لامدخلاتي قابله مخرجاتي
ولا امنياتي لاقيه من يمول

....

واجه الخذلان بالصبر والبال الطويل
منت بـ أول من تجمل ولا أخر من خذل

بقلمي

ياليت الايام في يديني وارجعها
واعدل اشياء ماكانت على بالي

...

‏الله يمسي راعي الخير بالخير
الي بوسط القلب باقي محله

الصاحب الي له مكانه وتقدير
أغليه وأحبه وأعزه وأجله

كل مانشدته قالي منزلك غير
تمر السنين ولا لفى منه زله

أن ضاق بالي عاضني بالتياسير
ون ضاق باله جيت له فدوةٍ له

....

‏يافاتنه والشوق ماله براهيين
مثل الحقوق الضايعه في زمنّا

ينشاف لامن طاحت العين بـ العين
وان مر بال مرّيح البال غنّا

خلوني أزبن قلب سيد المزايين
إلى متى وانا زبون المجنّا

محتاج لي فنجال من وجهك الزين
لونه مثل لون الذراع المحنّا*

....

يقولون الزمن عايب وانا اقول الزمان ادوال
ولا دامــت لغيـــر الله ما دامت لاحد ثاني

زمانك لو صفالك فاحتزم له والرجال افعال
يجــي لك يوم وانك ما تجد قاصي ولا داني

يقولون العــرب الايـام عبرة والزمان احوال
تعلمــك الحياة الدرس والتعليم مجـــاني

صروف الدهر سنة تشمل الخمال والعقال
ودورات الزمـــان تســدد المظلوم والجاني

وفي عرف الكرام الطيب مكسب والغلط بطال
ومن طبـع الكبـار يراعوا المحبوب والشاني

وفي الاعراف والاسلاف والعادات والامثـال
يحل الكايـدات رجال تصبر والعمــر فانـي

....