فوق هام السحب ( الشعر الشعبي) على متن القوافي

حزمت في قلبي تفاصيل ذكراك
‏وحدّدت للفرقا من العام ميعاد

‏واخترت تاريخٍ تحبّه ويزهاك
‏تاريخ فرقا كل ماراح ينعاد

‏في يوم ميلادك تعمّدت فرقاك
‏أبغيك تذكرني مع كل ميلاد

....

عمر العنب ماشال هم العناقيد
‏ولا درت عن ضيقة الأرض غيمة

‏ولا شكى كثر الوطى واسع البيد
‏ولا جرح وجهه الحيا قِل شيمة

‏العقل نعمة والقناعات تجديد
‏وأفكارنا ماهي بدايم حكيمة

‏بعض الوضوح أحيان يحتاج تعقيد
‏لأن الحياة أصلاً ماهي مستقيمة

....

يكفي وفاك وطيبتك في نواياك
‏ويكفي ليا من زاد همي نصيتك

‏حياك في وسط الحشا لاعدمناك
‏القلب قلبك والشرايين بيتك

....

أنا ببعد عن دروبك وأكمل باقي سنيني
‏لأن البعد يتعبني وفرقى من تحبّ تلوع

‏فمان الله أنا آسف ترى ماهو بيديني
‏لأن درب العشق واضح وأشوف إن الأمل مقطوع

....

ذخرتك للشقى صدرٍ يكفيني عن الباقين
‏و ذخرتك للمدى هقوه تشتت كل ضيقاتي

‏انا ياضحكة سنين الزمان وكل علمٍ زين
‏تركت الناس متعمد وعليك اسوق هقواتي

....

ايه أحبه كثر حبي للمعاني والقصيد
‏وكثر ماهلّت دموعي يوم حل موادعه

‏أحتاج له كثر إحتياج القلب للدّم والوريد
‏وأنفعه مثل العشير الي عشيره ينفعه

‏آه لو أملك ربع ماتملكه ايد الوليد
‏لأجل أحقق أمنياته ولأجل ألبي مطمعه

....

من يعز النفس مايصبح ذليل
‏والردي الوقت يكشف لك رداه

‏ماتحسفنا على فعل الجميل
‏نعتبرها في الردي مثل الزكاه

....

ماجاء ردى مني ولا جيت بقصور
‏طبعي كذا دايم مع الخلق كله

‏لي عزةٍ تطغى على كل دستور
‏من خلقتي والطيب عندي جبله

‏ياقلب من قفى عن العين معذور
‏نفسي عزيزة والمقفي تمله
‏
....

بعض البشر محتاج للذوق خبره
‏عندي نصيحه له على مَرّ الازمان

‏المرء بأخلاقه وذوقه وفكره
‏وبروعة أسلوبه يصيرأجمل انسان

....

سلام الله لمن يقرأ سلامي
ويسلم من يبادلني سلامه

سلام يرتوي به كل ضامي
وفي الوجدان تبقاله علامه

ويشفي من بقلبه جرح دامي
ويزرع فالوجوه الابتسامه

بتقديري وودي واحترامي
إليكم ود قلبي واحترامي

بقلمي