فوق هام السحب ( الشعر الشعبي) على متن القوافي

‏تفاصيل شخصيتي لو اخذ عليها زوم
‏يجوز اكتشف لغز التناقض ولا احلّه

‏غموضي يوضحني وصمتي سوالف قوم
‏ورحيلي بدون عتاب واسباب وادلّه

‏تكاثرت خذلاني وقفّلت باب اللوم
‏ملامي على روحي وصبري على حِله

‏من العمر كله ما اعرف كم باقا لي يوم
‏لكن جعل باقي يوم يسوى العمر كُله

.....

‏من دافع الاهمال والا مراعاه
‏بديت احس ان الامل بالقطاعه

‏وعشان اعيش اللي بقالي بلياه
‏حطيت في نفسي بهجره قناعه

‏على الاقل اقنع ببعده وفرقاه
‏ولا اتشفق للوصل كل ساعه

.....

‏عطاني علومه كلبوها ورحت وراح
‏ولا طحت من عينه ولا طاح من عيني

‏ياليته جرحني قبل يقفي عشان ارتاح
‏ولا قال عند موادعه لاتخليني

‏لكنها ظروفٍ محكمه والظروف شحاح
‏مصير القدر يرضيه قدام يرضيني

‏قطعت الرجا من يوم برق الموادع لاح
‏وغدت كل حاجه ماتبكي تبكيني

.....

‏حبيبي مابقى عندي صبر يتحمّل التأخير
‏رحلت وعقبك الدنيا غلاها طاح من عيني

‏تصدّق والا ماتصدّق أنا عاجز عن التفكير
‏تعال وشوف في عينك غيابك وش عمل فيني
‏
‏أجاوب اللي يسألني عن أخباري وأقول بخير
‏وأنا لاخير بغيابك ولا حاجة تهنيني

.....

عشقنا الطناخه وارتفعنا عن المنقود
‏رقينا على عرش الكرامة ولازلنا

‏طموحاتنا بعزومنا تبلغ المقصود
‏وعلوم القلوب الحاقده ماتنزلنا

.....

‏عود لسانك في حياتك على قول
‏شي يفيدك في نهاية حياتك

‏سبح وكبر واذكر الله على طول
‏هذا الـرصيد اللي يفيد بمماتك

.....

‏حاولت أداري خاطرك وأتبع رضاك
‏وهذا هو اللي زوَّد الطّين بلّه

‏تخطي واعدّيها واطوّف خطاياك
‏طوّفت لك تسعة وتسعين زلّة
‏
‏هذا وعد مني ليا رحت لأنساك
‏وامحي وجودك من على الكون كلّه

‏كنت متعلّق فيك وأخاف فرقاك
‏واليوم لا أحبك ولا قالها الله

.....

‏تدور الليالي والمقادير خيل وجيش
‏ولولا الصبر ماكان رحنا ولا جينا

‏رمتنا الليالي في نعيم الطرب والطيش
‏وشلنا على ركب الهقاوي هقاوينا

‏طوينا سجلّاتٍ كثيره عشان نعيش
‏ماندري إن سجلّات المقادير تطوينا

.....

‏الشجاع يشوف معنى الحياه مغامره
‏ان ربح وان ماربح حكمته بكره تزين

‏والجبان يشوف كل الحياه مؤامره
‏البشر فيها عِدا والفرح فيها كمين

.....

صبرنا على ماجابه الوقت زين وشين
ولا حطمت صكات بقعا عزايمنا

نحشم الرفيق ولا طردنا ورى المقفين
وعلى نخوة الناخين نحذف عمايمنا

.....