فوق هام السحب ( الشعر الشعبي) على متن القوافي

تجارب الوقت مامرّت مرور الكرام
‏خلّت عقول الرجال اكبر من اعمارها

.....

استريحي ياعيوني مابقي فالامر شك
خان قلبي فالنهايه من حسبته مايخون

والله ان القلب موجع والالم فالروح دك
وامتلا الاحساس بالحسره وخيبات الظنون

مابقي من بعد هذا يازمن لاكان بك
في شعور الغدر من بعد الثقه فرصه تكون

روح يامن خنت عهدك وانقلع واللعن لك
اوعدك تلقى انتقامي يملي احساسك غبون

كنت افكر مابقي فالبحر من بعدك سمك
بعدما شفتك على الشاطئ وحزنك فالعيون

تشتكي لي من همومك والالم ذا حل بك
وانت تبحث عن محبه تملي ايامك سكون

واحتويتك بعدما قلبي برغبه سلمك
كامل السلطه على كل المشاعر والشجون

وانت جازيت الوفا مني خيانه وايش لك
من فوايد غير ذكرى خايبه يا آخر زبون

......

‏تضيق لكن فزعة الله قريبه
الله مقرب فزعته يوم تنصاه

والجود لولا الجود نخوة وطيبة
كان العرب متساويه مالحد جاه

الناس تعرف في الظروف العصيبة
حد فاله البيضاء وحد فاله عداه

من شق جيب الناس ينشق جيبه
ومن يجحد المعروف ماعاد يلقاه

والله قسم للخلق كلن نصيبه
والدائم الله يا المتيم بدنياه

ردي عليهم يا الجبال الصليبة
قولي لهم من يزرع الطيب يجناه

.....

‌‎وش دوى البرد جيبوا لي علاجه وطبّه
مانفعني عسل دوعن ولا لوز خولان

مايضمّد جراحي غير قرب ‎الاحبه
وما يداوي فؤادي غير مزيون الاعيان

.....

لله درك اينما كنت لله
الله خصك بالسلوك الرفيعه

من حيث ماحل الوفا فانت تاطاه
فيك الوفا والطيب طبع وطبيعه

ياطيب طابت لياليه مغلاه
ماينحني للوقت صيفه ربيعه

نمشي على كف القدر ماحسبناه
ونضحك فلا ضاقت علينا الوسيعة

لنا في مصاف الخير عالم بنيناه
من الحب ماتجري عليه القطيعه

من الطيب نشري من شرانا ونفداه
ومن طبعنا من باعنا مانبيعه

.....

‏ساري الليل ما ادري وين عز الطلب
كل ماشفت زولْ قلت ربعي قريب

غيب الجدي والسبعه وصبحي قرب
النجوم اختفت كل الشواهد تغيب

عادتي في سكون الليل اشوف العجـب
اهتدي بالنجوم ونظرتي ماتخيب

.....

‏درهموا بالركايب يازهات السلب
وردوها وراها قيض حامي لهيب

واين راعي المشورة والعزوم العجب
والله اني بحاجة للرفيق الصليب

الفسـالة سهيلة والجمالة تعب
والمراحل طويلة حظنا والنصيب

.....

يامرحبا وهلين ياطيب الفال
‏اقلط بصدري وبضلوعه تفيا

‏جيتك ونا كلي من الجال للجال
‏معجب وهايمبك وعاشق سويا

‏شارب هواكِ شرب كيفٍ بفنجال
‏كيفٍ يروّق راس مغليك ذيا

‏مالك شبيهه نادره حسن وقبال
‏الله حسيبك ويش سويت فيا

.....

الصراحه كلها سبعة حروف
وكل حرف منها يوزن ذهب

والخيانه مثلھا سبعة حروف
وكل حرف منها يشعل لهب

.....

‏ودي أضيع بين يديك عقب البعاد
‏ضيعة إللي ماعيّن عاقلٍ ينصحه

‏سولفي أنتي أفصح من نطق حرف ضاد
‏لو كلامك خطا جمالك يصحّحه

‏مقتنع في جمييع آراءك من الوداد
‏لو تقولين طار الطير دون أجنحه

.....