فوق هام السحب ( الشعر الشعبي) على متن القوافي

وصل الكلام اخر حدود الميانة
‏واللي تعثر قام واللي قسى حن

‏مافيه احد يستاهل انّك عشانه
‏تعيش راجي فضل وتموت ممتن

‏ودّك ترجّع كلّ شيّ بمكانه
‏ بسّ المسير لوين والخطوة لمن

‏لاخانك اللي كنت خوفه وأمانه
‏بيخونك التعبير ويخونك الظن

.....

‏معك ربّيت المحبة على قد الطموح
‏والنصيب يحدها والجفى يومي لها

‏اثري الغيبه حقيقة وأنا احسبها مزوح
‏قامت الدنيا علينا وشدّت حيلها

‏ياحبيبي انشد الوقت والحظ الشحوح
‏من جدار البال ، صورتك كيف أشيلها

.....

يا واحد جابك الله حلم وأعجوبة
‏الأرض ماتليق بك خذ موطنك صدري

‏قبلك حياتي ترى ماهي بمرغوبة
‏وشلون جدّد وجودك رغبتي مدري

‏عن عيني الناس ملغيه ومحجوبة
‏ما أشوفك إلا سماي وكلهم حدري

.....

يا واحدٍ ماخاب من لاذ بحماه
‏يارب وانت اللي بالاحوال داري

‏طالبك يامن تلهج الناس باسماه
‏غيثٍ سنا برقه يشق الغداري

‏يمطر على قفرٍ له سنين مظماه
‏عقب الظما يصبح ربيع وخباري

‏يبطي على وجه الثرا ناقعٍ ماه
‏في كـل وادي كنه النهر جاري

.....

أخاف أشكي ويلحقني من أفواه العرب تجريح
‏وأخاف أبكي ويلوموني على دمعٍ تساهلته

‏عجزت أشيلها نفسي وأنا لامن وقفت أطيح
‏معاذ الله من شيءٍ حصل لي ماتحمّلته

‏تلاشت كل لحظات الأماني في مهبّ الريح
‏َولا شيءٍ بقى لي غير حسراتي ولملمته

.....

كثر ماحن صدري للونيس وكثر مادرهمت
‏فجع صدري حنيني واتعب الاقدام درهامي

‏أحسب انك تيمم بأتجاهي وين مايمّمت
‏اثر لا انت بورايه بالطريق ولانت قدّامي

‏ختام السالفه ياطيب العشره كرمت ودمت
‏هذا حقك علي وحق شرهاتي على أوهامي

سعد بن جدلان

‏عز الله اني جزت عن كل ماقول
‏لاشك ردتني على القول صيحه

‏لاياعيون اللي ليا صك بالجول
‏منه ابرق الجنحان عجلٍ مطيحه

‏ياعود ريحانٍ رفع غصنه الطول
‏بستم قليبه مايهون ضبيحه

‏يوم استوى عوده على داير الحول
‏عجو به التجار من زين ريحه

‏ياشيخة الخفرات من زين ودلول
‏من مات من سبّتك ربه يبيحه

.....

‏ياربيبة قصيدً مايبرر غيابه
‏الا موت الشغف والا غياب النديمه

‏خلّي الشعر يلقى فيك حضرة جنابه
‏لين يزهر يباسه ويتجدد قديمه

‏وسولفي لين اشوف لكل ضيقه رحابه
‏واضحكي لين اشوف دروبنا مستقيمه

‏من يحبك يخاف من الفراق ويهابه
‏ومن بعد موعدك ما للمواعيد قيمه

.....

‏هلا مرحبا ماذعذع امن الشمال البرْد
‏وماناحت الورقى وماعسكر الذاري

‏وجودك معي مصدر فرح ياشبيه الورْد
‏وبدونك تفاصيل الفرح مالها طاري

‏طواني غرامك مثل طوْي السنين الجرْد
‏ولا زال حبك فالحشى بايع وشاري

‏هواجيس قلبي جا لها فالحنايا ورْد
‏من البارحه مفعولها فالحشى ساري

.....

‏لو مسكت السحابه مابعد قلت هلّي
‏التعفّف فضيله والوقاحه جروّه

‏والمروه لو إنها فالفقير المولي
‏أفضل من الغني اللي ماعنده مروه

‏حيّ طاري القروم وفرقا طاري اللي
‏لاصديقه صديق ولا عدوه عدوّه

.....