فوق هام السحب ( الشعر الشعبي) على متن القوافي

‏أسافر بلا توديع وارجع بلا استقبال
‏ولا احس بالفرقا لو ان الزمن عكسي

‏ما احب الوداع اصلاً لأنه يغث البال
‏فلا حد يودعني سوى صاحب التكسي

.....

‏لاتاخذك شكه مع اللي يشكون
‏مانيب لامرخص ولاني بجاحد

‏قلبي لو ان حوله من الناس مليون
‏مافيه غيرك ساكنه وانت واحد

.....

‏تعبت اداري واجاري ذهنك الشارد
‏وانا تعذرت يوم اخطيت حزتها

‏وزودتها بالقسى واسلوبك البارد
‏مابي العلاقه معك تفقد مكانتها

‏صحيح انا خطيت يوم ان الخطا وارد
‏لكنّ الاحباب لاتجرح كرامتها

.....

‏والله اني فالمحبه مشتريك
‏خل قلبي ياخذ اللي ماخذا

‏أعشقك وأغليك واحبك وابيك
‏وش تبي أقول أكثر من كذا

.....

‏الحزن ماهوب يصلح لالمحته عليك
‏لو انك الجارح اللى مابعد سرني
‏
‏متعلق بشطر يطري لي وكنّه يعنيك
‏عندك مايثبت غلاتي عجّل وورني
‏
‏لاعاد تشكي علي لو يثر الحزن فيك
‏سولف علي بابتسامه وجهك وجرني
‏
‏سلمني شعور قلبك لاتلوح يديك
‏ومنين ماضقت من جور الزمن طرني

.....

‏ناسٍ تبيّن لي مع كل شدّه
‏وناسٍ توارت يوم محدٍ زهمها

‏وناسٍ عدمها من حياتي مسدّه
‏وناسٍ لا والله جعلني ما اعدمها

.....

‏الكلمه اللي ماتجملنا على وجه العموم
‏ابرك لها تقعد وشرهتها على حنجورها

‏اليا سكتنا ماسكتنا الا على شان السلوم
‏وان شانت الدعوه ضربناها على دنقورها

‏ اليا قعدنا تقعد الدنيا ولاقمنا تقوم
‏مالله خلقنا نرضي العالم وناخذ شورها

.....

‏على البال ياسيد الشوارد فداك البيت
‏طواري تمر الأولويّات وتخطّر
‏
‏لكن قبل سرقة ماتبقى من التوقيت
‏فدتك العيون وعرض الأزوال والخطّر
‏
‏عسى الليلة اللي كنت فاضي وفيها جيت
‏عوض ليلة اللي كنت غايب وانا مضطّر

.....

‏ماغبت عن قلبي ولا هان طاريك
وما فيه أحد يقدر يكون بمكانك

لاجاتك الضيقه وشانت لياليك
تذكّر اللي باع عمـره عشانك

.....

ماتستريح العين والبال مهموم
ولا يستقر الحال والقلب خايف

غديت مثل الي بالإعدام محكوم
مامات لكنه من العمر عايف

.....