فوق هام السحب ( الشعر الشعبي) على متن القوافي

وقلب جرحته لاتحاول تداويه
‏خله يعاني من قساوه طعونك

‏بالله قلي ماحصل وش تسميه
‏أغلى حبيب لك بلحظه تخونه

‏حاولت بك ولاحصل شي ابيه
‏وخيبت ظني خيب الله ظنونك

‏تصفي لغيري بالمحبه وتغليه
‏وتبيع ناس بالموده يبونك

.....

رجلٍ الى مال الزمن يرتكي له
ورجل ٍ الى مال الزمن جاك مايل

ورجل ٍ ذخيره للظروف المهيله
ورجل ٍ يجي مع ظرف الايام عايل

تكشفهم اوجيه الليالي الطويله
لك تنكشف كل الامور الهوايل

الهاب بدر

ياسلام الله على من يجيني قبل اجيه
‏من وفاه يبادر بكلّ طيب مبادره

‏من يحصّل صاحبٍ طيّب يحافظ عليه
‏والله إنّ الطيّب اليوم عمله نادره

.....

‏أضحك وأنا لجروح الأحباب جاحد
‏أداري المكنون عن كل عين

‏ماودّي أفرّح على القلب حاسد
‏ولا عذابي في عيوني يبين

‏شيٍ يهون وشي بالحيل كايد
‏ياكود تجريح الخفوق الحزين

‏من عانده وقته وقلبه يعاند
‏مالت به الدنيا يسار ويمين

.....

عشت ياصوتٍ يعود الليل ذكراه وحنينه
قالو العالم نساك وقلت والله مانساني

والله ان قلبه جريح ووالله ان نفسه حزينه
ووالله انّه مثل ما أعاني من الفرقا يعاني

لو نسا وجه الفجر صبحٍ يصبّر ساهرينه
مانسيتك يا أوَّل أحبّك نطق فيها لساني

.....

طفل الوله شاب راسه وانهدم حيله
شف من متى مانعه لايطري عيونك

تسمح لي اعيش بك في بالي الليله
بعض الليالي قهر تنعاش من دونك
.....

‏وصل الكلام آخر حدود الميانة
‏واللي تعثر قام واللي قسى حنّ

‏مافيه احد يستاهل انّك عشانه
‏تعيش راجي فضل وتموت ممتنّ

‏ودّك ترجّع كلّ شيّ بمكانه
‏بسّ المسير لوين والخطوة لمنّ

‏لاخانك اللي كنت خوفه وأمانه
‏بيخونك التعبير ويخونك الظنّ

.....

ياحبيبي كيف بالله تتركني وحيد
للوصال احبال وانت قطعت احبالها

وش يفيد الهجر بالله قلي وش يفيد
حالتك يرثى لها وحالتي يرثى لها

.....

رفيقي الوافي على الراس اغليه
مكانته يرقى لمثن السحايب

اشتاق له لني اعزه وباغليه
حاظر معي حتى ولو كان غايب

.....

‏مكتفي باللي يجي منك من باب الوصال
‏إن عجزت تسوي الصعب سوّ المفترض

‏أرسل إن عيت عليك الظروف الاتصال
‏الرسايل بعض الاحيان توفي بالغرض

.....