فوق هام السحب ( الشعر الشعبي) على متن القوافي

‏الخيره احيان تاتي لك بما تكره
والنفس لولا الأمل ياويش يحييها
⠀
احسن ظنونك بربك وانتظر بكره
بتشوف مايسعد عيونك ويرضيها

.....

‏انا في رجا الله واطلبه كل ماصليت
‏عن الناس واللي من ورا الناس يغنيني

بقلمي

‏لو نطلب الناس ماسرّت ولا ضرّت
الخالق الله وحنا من مخاليقه

يالله بنفحات جودٍ كل مامرّت
يمر معها فرج ربي وتوفيقه

.....

اصبر على ماجاك وإقبل بما جاك
وحبل الرجا خله مباري لحبلك

لو تضرب الدنيا من هناك لهناك
مالك من الدنيا سوى ماكتب لك

.....

بعض الاوادم عطاه الله على طيبه قبول
ان جاك زاد الغلا وان غاب زاد الغلا

.....

رطّب لسانك بذكر الله العظيم
يارفيق الخير قول استغفر الله

فيه تفرج كل هم وكل ضيم
ومن ذكر ربه يلاقي الخير كلّه

بقلمي

الناس نعمه ونقمه والثقه ماتدوم
مهما تكابرتها والا تصاغرتها

بعض الاوادم ليا شفته نسيت الهموم
وبعض الاوادم ليا شفته تذكرتها

.....

كم اقنعه طاحت وبانت حقايق
وكل واحدن بان ايش هوه مخبي

تساقطوا جمعه سوا في دقايق
بفضل ضيق الوقت وبفضل ربي

.....

رافق ولكن لاتوافق على خمس
لو يطلبونك صحبتك لاتوافق

فاسد وراعي بخل والمزعج العمس
ومعهم رفيق المصلحه والمنافق

.....

‏إلى متى والناس تكذب على الناس
وإلى متى بعض الأوادم تجامل

ماتت ضماير ناس ماعندها إحساس
والكذب صار أرقى فنون التعامل

.....