فوق هام السحب ( الشعر الشعبي) على متن القوافي

ياكثر ماغنيت في يوم فرقاك
ابيات تنزف من جروحن حزينه

انا وحزني والليالي وذكراك
الاربعه فينا مواجع دفينه

.....

‏ياربّ خذني من بساط الدالهين الغافلين
‏وأجعل بنفسي لامشت درب الخطيّه تنفره

‏وأرزقني القدره على التقوى وبر الوالدين
‏أبي من الكره أخيره وأبي من الخيّر أوفره

‏وأجعل كتابي لاخذيته ما أخذ إلا باليمين
‏مع النفوس الراضيه ومع الوجيه المسفره

.....

احبابي اللي في هواكم اغني
ترا حياتي بعدكم ماهي زينه

البارحه اطق طاري وأغني
أغني ابيات عليكم حزينه

.....

الله يذكر ذيك الأيام بالخير
وانتي قريبة كنت اشوفك بعيدة

واليوم انتي غير وانا بعد غير
ياليت وقت ٍراح نرجع نعيده

يرف قلبك لي مثل رفة الطير
اكتب من دموع المعايد قصيدة

انسي معك معاد ابي اي تبرير
من ضحكتك تبعث حياة جديدة

احب اعيش الحب بلا معاذير
احب اعيش المستحيلة اكيدة

.....

عاداتنا شامخه وهذي طبايعنا
والحمدلله على إلهامه مراسينا

مانشتري بالكرامه شخص بايعنا
ولا نبيع بكنوز الأرض شارينا

.....

من لايعيش العمر سامي ومتغاضي
ماهيب دايم ظروف الوقت خادمته

كنز القناعه غناة النفس للراضي
يعيش دنياه فاهمها وفاهمته

.....

انا وصلت لمرحلة ما ابي شي
‏والمرحلة هذي ختام المراحل

‏لا باكيّن ميت ولا راجيّن حي
‏ولانيب متحسف على كل راحل

‏شفنا وعفنا وانتهت رحلة الغي
‏ماعاد به مركب ولا فيه ساحل

.....

ضاق المكان اللي من أول أحبه وأجيه
‏مدري هو الدرب والا الصدر مابه سعه
‏
‏كم مرّت وجيه في عمري وعدت وجيه
‏ومافيهم اللي بقى لي أو خذاني معه
‏
‏ياعابرين الحياه أحتاج قلبٍ نزيه
‏عفويتي قابلتها قلوب متصنعه
‏
‏القلب مافيه أحد يستاهل يعيش فيه
‏رفعتهم فوق لكن طاحت الأقنعه

.....

كبرت أتفكّر وأتقرّف من التقليد
‏وأخيل العوض لو كان منيب معتاضة

‏ما أحب أنحصر في زين قامة و طولة جيد
‏أنا روحي أكثر روح حرّة وفضفاضة

‏يخوّفني النسيان واخاف لا التخليد
‏يخوّفني أكثر والمقادير ركّاضة

‏أنا فالنهاية بنت بدوٍ منيب أحيد
‏تضاحك لو إن عيونها السود فيّاضة

.....

‏ماني بمحتاج شي اكثر من السلوة
‏خل الهبوب الله يخليك تطرقني

‏يمكن يخف الحنين وتصغر البلوة
‏وارتاح من همي اللي كان مرهقني

‏امّا انّي انساك وانسى ايامنا الحلوه
‏هذا هو المستحيل يصير صدقني

.....