فوق هام السحب ( الشعر الشعبي) على متن القوافي

خل البشر تذكرك بالخير والطيب
السمعه الزينه رصيد وغنيمه

ان جيت تلقى المسهلا والتراحيب
وان غبت تمدحك النفوس الكريمه

محبة العالم من اغلى المكاتيب
بعيونهم بتشوف معنى الحشيمه

.....

كل القصايد في غلاك مدوّنه
الله ياصدق المشاعر والحروف

زرعت في دربك ورود ملوّنه
وأثرك بليدً لاتشم ولا تشووف

.....

حن الخفوق وقايد الشوق مقدام
‏حنة عديمٍ نافذٍ منه صبره

‏سريت مسرا اللي مع الخط مانام
‏مغرم وساري له على صوت نبره

.....

- اما عن الأماني :
‏تمنيت شي وقدّر الله شي وصار
‏ولا لي سوَى وجه الرضى لو تصنعتّه

‏- واما عن الخيره :
‏أنا هقيت إن راحة العبد في ما أختار
‏واثَر خيرة المولى لعبده مسنّعته

‏- واما عن الواقع :
‏تبون الصراحة والله إني بغيت انهار
‏ظروف الحياة أقسى من اللي توقعته

من يلوم القلب لا منه تباها
في كبير الجاه شيال الثقالي

ما بقى قمة مفاخر ما نصاها
راقي شم المراقيب الطوالي

لدراك الصعبه يجيب اللي وراها
ثم سندها على روسس المعاليي

كيف ما غتر دام انا عيني ملاها
اللي مزود مع غروري دلالي

.....

اللي لسانه طلق من خلف الستار
‏تلقاه قدّام العرب فيه طْرمه
‏
‏الطيّب اليا شبّ للضيفان نار
‏كنه يشب النار في كل رخمه

.....

والله انك بهجت افراحي وعيدي
ونك اجمل همس من بد البريه

جعل يفداك القدايم مع جديدي
والحروف الانقلش واليعربيه

.....

‏علمني الصدق حط لريبتي رادع
‏حتى ظنون الحزين توافق شعوره

‏لسانك يرّحب ونظراتك توادع
‏أصدق الصوت والا أصدق الصوره

.....

بادري بالعذر وانا بابادر بالقبول
‏ المحبة وجهها ادناة عذر يبيّضه

‏ولا نويتي بشريني متى عاد الوصول
‏أنا مستعجل على الوصل وأنتي ريّضه

.....

محتاج ليه عسل صافي
وين انتو ياللي تبيعونه

هذا الزمن ناس ياكافي
حتى المفتح يغشونه

متعب الحربي