اخترنا لكم

في وداع الله وأمانة يا ريمية حشاي
‏خذتي من العمر لذة شبابة وأجمله

‏لا أستوى في عين شوقك رحيلي مع بقاي
‏إستوي يالأرض ما للغريب إلا هله

.....

من جا نرحبه على العين والراس
ومن صد ما نرجي من الله وصاله

.....

والله اني بعض الأحيان ابتلش في حالي
‏من خطايا غاليٍ ما يستحق اسبّه
‏
‏ودك أن الغالي اللي يدري انه غالي
‏ما يقوم يكرر الـغلطات وأنت تحبه

.....

تربعي بين الحشى والأزارير
واخذي على ترويقة البال فله

وإلا اصبري بطير القلب تطيير
وإنتي تعالي واجلسي في محله

.....

كنت أظن أن مرّت الأيام بيجف أنتظاري
ماهقيت أن الأمل يستمطر أليا جف بيره

كيف صارت وحشة الغربه تغني في دياري
ذبلت أنوار الشوارع وأنطفت شبه الجزيره

وش على يمناي تتحمل شقى خطوة يساري
وش على القلب يتحمل صدمة الوهم الكبيره

لـ الليال الذكريات ولـ الصباحات الطواري
ولـ العبور التضحيات ولـ السنين البُعد خيره

العمر ماهو مشاورني ولا رهن لـ قراري
العمر يمضي وسيف الوقت مايحضن جفيره

ذي نجوم التايهين اللي تجلّت في مداري
وذا خفوقي مؤمن أن التيه منفاه ومصيره

.....

لك الله يالمزاج الصلف وزادك خاطرٍ حساس
تضيق مْن الهبوب اللي تحرك طارف ثْيابك

وتفرح كل ماربي يسوق من المطر نسناس
وتهدأ كل ماقامت صلاة وتبرد أعصابك

رغم خوفك من الوحده تعاف المجتمع والناس
وضاقوا كل من حولك من أصحابك وأقرابك

.....

يارفيق الذكريات وياشريك فْؤادي
كل ظنٍ فيك ظنيته تجي من فوقه

يْتسلل صوتك من الذاكره وينادي
لين يفتق جوفي اللي كنت أخيط فتوقه

أيه يا لبيه يا موتي ويا ميلادي
جعل حزنٍ مرني ماتونسه وتذوقه

ياوقودي وأندفاعي فالحياه وزادي
ياحشاشة جوفي وقلبي ودمّ عروقه

.....

‏خذ ماتبي من غلاك وعطني عتابك
وإجرح وماجاز لك في عاشقك سوّه

وراك قلبي مجوّد طارف ثيابك
طفلٍ ربى في حجاك وفاطمٍ توّه

لي بال لاغبت ماينساك فغيابك
يرعاك هتّانه وهمّاله ونوّه

وإن جابك الشوق ماني قايل شجابك
بضمّك بكل ما أوتيت من قوّه

.....

‏يقولون كل طيب ياخذه الزمن ويموت
‏وأنا أقول يبقى كان نسله على ظنه

‏ اليا مر له طاري ترد العرب بالصوت
‏يا مال الوسع فالقبر والعفو والجنه

‏يقولون دايم والردي ما يجيه الموت
‏وأنا اقول يفنى مير محدٍ درى عنه

.....

‏نبعد عن زحام المخاليق ونغيب
‏والبعد بعض احيان للراس راحه

‏يبعدك عن كثر الحكي والاكاذيب
‏وبينك وبين الناس يعطي مساحه

‏لو ان بعض البعد مابه مكاسيب
‏لكن فيه الصدر يلقى انشراحه


.....