فوق هام السحب ( الشعر الشعبي) على متن القوافي

‏انت الحلا كلك حلا والنعومه
وانت الهنا وانت الغلا والموده

القلب جالك دون بايع يسومه
احفظ خفوقي اوطلبتك ترده

هذا خفوقي دوم هذي علومه
وافي مع اللي بالوفا بان جده

.....

اهتف باسمك ويجاوبني صدى الصوت
كل ما اقول وينك يرد ويقول وينك

انا باقي على العهد لين يا خذني الموت
وابقى على الامل عيني تشوف عينك

.....

‏يـامـصـدرالشوق يـانـبـع الـغـلا كـلـه
تـعـال نـاظر رسـومك داخـل جـفوني

لاتـزعـجك ضـحكتي لـلـناس والشّله
اجـامل بـضحكتي لو زادت اطعوني

حـبـك مـلك خـافقي والـعرش محتله
دوك الكلام الصحيح ودوك مضموني

.....

‏يا مدعين المحبة زايفين الشعور
سوق المشاعر جحدكم قال محدن شرا

شرهاتكم تلحق الموتان وسط القبور
ونياتكم ما تقدي الساري اللي سرا

خافوا من الله ترا الدنيا متاع الغرور
ارخصتو الحب كنه سلعةٍ تنشرا

الحب حاجة ما تدخل ضمن آخر ظهور
يبقى مخلّد لو ان صاحبه تحت الثرى

.....

الله يمسيكم على ماتحبون
‏والله يقويكم لطاعته ورضاه

‏ياجعل من عسرت مطاليبه تهون
‏وياجعل من له منوةٍ يلحق مناه

بقلمي

‏كنت أحب الصبر وأحلامي تضيع
‏وضاعت الأحلام يوم إني صبرت
‏ㅤ
‏كنت أقول أكبر وأحققها جميع
‏ما تحقق شيء غير إني كبرت

.....

ابيك دنيا اعيشها طول الأزمان
وابيك شوق كثر ماابيه يبيني

ابيك حب ماشعر فيه انسان
وابيك عشق بين قلبي وعيني

.....

سلام لك من صادق القلب مشروح
ياللي غلاك بداخل القلب ماراح

ناس تجي وتروح ماهزت الروح
وناس غلاها ثابت وسط الارواح

.....

‏اسمها دنيا ولا فيها كبير
الكبير الله ولا غيره احد

في نهايتها الغني مثل الفقير
كلهم نفس الكفن نفس اللحد

بقلمي

‏ياشوق قلبي باقي الوقـت مافـات
دام القلوب في داخل الصـدر حيه

من قبل اعرفك تايهن بين الاوقات
وساعة عرفتك اشعل الشوق ضيه

ماعاد بيني وبـين قلبك مـسافات
وما عـاد بينك وبـين قلبي خـفيه

.....