اخترنا لكم

مابين هرجة سفيه وبين نظرة فطين
‏تـلقى كـلام الحقيقة وإختصار الكلام

‏مـا يـشـره الطيبين إلا علـى الطيبين
‏والا ضعاف الـروابـع مـا عليها مـلام

.....

خيــر الكلام اللــي قليله يدلّك
‏أخير من واجد ولا فيه مضمون

‏بعض العرب هرجه كثير ويعلّك
‏دايم وهو ما بين قـالوا يقولون

.....

يا صاحبي لا تنشد الا عن الطيب
‏رغـم الظروف القاســية ما علينا

‏دايـــم وحــنا للهقـاوي معازيب
‏شف كيف هقـوات الرياجيل فينا

‏الطيب يولد من بطون المواجيب
‏وحـــنا وراه مشمـــرين ٍ يـديـــنا

‏ما نعرف الا نمد ونجــود ونطيب
‏هـــذي الخيــارات المتاحه لدينا

.....

‏على كثر الوجيه الغايبة عن راسي المزحوم
‏حضر وجهك نيابه عن عموم وجيه غيّابي

‏يعسّ بقاع بالي فيضة جروح ومناقع لوم
‏وينصب له خيام من السهر ويطيّر أسرابي

‏خذاك الحلم من نوم العوافي لين صح النوم
‏وخذاني ليلٍ لا جيت أرقده وقف على أهدابي

.....

‏والله أني جيت ماني بمحدودي
‏ماخذك من زاوية طب وتخيّر

‏لين خوفي من مسامير الكبودي
‏ردني لأجيك ضيف ولا مسيّر

‏والغلا زاد وتعدا بي الحدودي
‏وأنت ماترحم كبيرك يا الصغير

‏لعنبو جدك تقول أنك يهودي
‏ماتقول أني برّي وأنسان خير

‏أنت حبك كنه الحكم السعودي
‏ثبته عبد العزيز ولا تـغيـر

.....

الصبح ربح وراقـد الصبح خسران
‏حتــى ولوّ ان مرقــده فيه ما فيه

‏واللـــي رفع راسه قبل رفع الآذان
‏شيطانه اللــي صـــافيٍ له يجافيه

‏الليـــل سجن وشقة النـــور بيبان
‏وظروف من ضيّع مخارجه تشقيه

.....

‏يشح البخيل وراعي الجود ماينذم
‏لو انه يبيح الكيف قهواك من دمه

‏وانا مايفـــور دمـــي الا ثقيل الدم
‏ليا قام يقـــدح فالنشاما وهو رمه

.....

‏ياعلي صب من أحمر الشاي كاسه
‏دام الطبيب يقول ماهو بممنوع

‏الاجـــودي يـا كـثـر شـكـواه راسـه
‏ولا عـاد عـنـده حاجـة تهدّي الرّوع

‏تـستكثـر الــدنـيـا علـيـنـا الوناسـة
‏مـا كنّــها للآدمـي حـق مـشـروع

.....

‏لا تحسبون العمر في طول الاجيال
‏عمرك لصــرت ابخير والجو طايب

‏احيان شايب وانت في عمر الاطفال
‏واحيان في عمـر الصبا وانت شايب

.....

أصعب شعور انك تمثل على الناس
‏وتظهر قبل حلـــو الكلام ابتسامه

‏ويظهر على وجهك علامه من الياس
‏والضيق له بين الحــواجب علامه

.....