اخترنا لكم

‏يـارب تــرحــمـني لـياقـيـل من راق
‏في ساعة تصعب علي بـلـعة الريـق

‏لاجا الوعد وإلـتـفـت الساق بـالساق
‏واتـلى الكلام الـغـرغره والـتـشاهيق

.....

‏يا شارع الاعشى هدمت البدايات
‏وشلون مافي في الحب رأي وتعاطف

‏باسبابكم عشنا شعور النهايات
‏وعشنا شعورك يا سعد مع عواطف

.....

‏على كثر ما غنى المغني على ليلاه
‏معايير راحة خاطري ماهي بواجد

‏ابي فرحة اللي رده الله على مرباه
‏وابي راحة اللي هل دمعه وهو ساجد

.....

‏ياصاحبي بعد ذكر الله وذكر الرسول
‏ترى الميانه مضرّة لا انفتح بابها

‏باب الخروج اعرفه قدام باب الدخول
‏واللي بصدرك مخازن صدرك اولى بها

‏لاتندفع خلف رغبات الثقة والفضول
‏اسرارك اسهوم ترميها وترمى بها

.....

‏يـاهواي وشف بالي ومطلوبي
‏كل كلمة حب في خاطرك قلها

‏عطني من الود حقّي وماجوبي
‏واكشف اسرار المحبين وازهلها

‏وان قضى هرج المحبّه يامحبوبي
‏مفردات الحب عدها من أولها

.....

‏ياحي القصيد الزين والبيت والبيتين
‏اليا صار سلة سيف ماهوب جنبيه
‏ِ
‏أنا بنت قومٍ فعلهم في الطغاه يبين
‏ولي عزةٍ فوق النجوم السماويه
‏ِ
‏مانطرد ورى المقفي ولا نتبع الغاوين
‏خلقنا كباريه ونبقى كباريه

.....

‏الكفيف اللي علــى المسجد سعـى
‏ما اتعض من فعلته شخصٍ بصير

‏العــمى بالقلـــب دامــه ما وعــى
‏دام قلبــك غافلٍ فانــت الضــرير

.....

‏عجزت أوصف ملامحها وأنا شاعر
‏ومن يوم ماشفتها تملاني الدهشه

‏حنا بدو فالحروب ألعن من الكافر
‏لكن بوقت الغرام قلوبنا هـشّه

.....

‏ياللي سرقت النوم والعافيه سـرق
‏يازاد قلب اللي هواك وحروبه

‏تغيب ما همك وانا الاحي الورق
‏ولا تخاف من الجفا والعقوبه

‏الوصل مرهم كبد ولا الجفا حرق
‏والصبر ينفض في غيابك جيوبه

‏كسرت كل ابواب وصلك من الطرق
‏وغيرك طرق قلبي ولانيب صوبه

.....

‏عندي طلب يا اخواني اللي فالإسلام
‏لامن بدر مني خطأ سامحوني

‏وان كان قفت بي مقادير الأيام
‏اما اذكروني بخير ولا اتركوني

بقلمي