اخترنا لكم شعر نبطي وفصيح

يا مسساء الشعر لا*غازل عيونك
واستلمها من هدبـها لا هدبــها

والمساء العذب مايكمل بدونك
وانتي اجمل صدفــةٍ ربـي كتبها

.....

‏تعبنا من الايام والعالم الفاضين
‏نجامل وآثر ساس البلا يوم جاملنا

.....

‏تهلَي في خطاويك النسايم والسحاب يهلّ
‏واغني لك بصوتي بين برّاقه و رّعاده

‏قلايد من عقود الياسمين ومن عقود الفلُ
‏لعنقك وانتي عنقك يستحق اكثر من قلاده

‏شعورك بالزهر فايح وشعرك بالمطر مبتل
‏ووجهك عادته يفتن وانا مفتون كالعاده

.....

‏يا سيد الظبا من كل لمحه وشكل ولون
‏ياليت المشاعر معكْ ماهيب جيّاشه

‏يا طول العمر للي على بالك يعيشون
‏ويا قصر العمر للي معك ما بعد عاشه

‏احبك على وضح النقا والعرب يدرون
‏يوم ان اكثر العالم محبتهم خْشاشه

‏لو اني موّطي النور في شاشة الايفون
‏انا لا فتحت صوّرك تنوّر الشاشه

.....

‏تعبت من ملحك وجرحك وطبَّك
‏ومن الخيال الكذب والواقع الكذب

‏ماجيت باستوطنك جيت أغترب بك
‏واقفيت ما لجروحك المدميَّة طب

‏مع إن ما بلّ الحشا إلا مصبّك
‏ما أحيّيت لي لهفة ولا أحيّيت لي قلب

‏ولا تطري الحب وتقول احبك
‏ما تعرف احبك ولا تعرف الحب

.....

‏ولا زلت رغم الخوف والبعد والتشكيك
‏اراهن على زود المحبه وكبر الشوق

‏من الناس ومن الحظ الاقشر ومن ماضيك
‏سرقتك وكان السارق اطيب من المسروق

‏على كل حال البارحه مرّني طاريك
‏تطرّق لك اللي شيب القاف والطاروق

‏ونشدني وقلت ان المعاريف تثمر فيك
‏مثل من يداري بالخفا جيبه المشقوق

.....

‏لك مدادي من سماي وفيك ظِلّي
‏كلّما شحّت على الأرض السحابة

‏كم توقّى في دقاق حْماك جِلّي
‏وكم بحثتك فَالقصيد وْفَي الكتابة

‏كنت أجيك من أوَّل الأيّام كِلّي
‏لين أكون أكبر سماء وأكثر رحابة

‏إن تبدّى لك نحيل الدّار طِلّي
‏ طلةٍ تجلَا عن النفس الكآبة

.....

‏انتهى عمرٍ من الحب يا سرع السنين
‏انجلا والله مدري على ويش انجلا

‏النهايه طعمها مر والتهميش شين
‏لو يحس المبتلي بنكسار المبتلى

‏المشاعر كنها القبر ما تاخذ ثنين
‏واحدٍ يدله و يسلى وواحدٍ ماسلا

‏سعد عينيّ قبل لا اكون مثل الاخرين
‏وبري حالي يوم بدلت لبيه بهلا

.....

‏يا ملح حلوات النسب فتنة الجيل
‏ سيرة مناسبك العريقه ما تحصى

‏اهلك لا ركبو على الجيش والخيل
‏مركاضهم يومي بالادنى والاقصى

‏ معهم تعوّد كل صعبه تساهيل
‏وعليهم خطوب الليالي ما تعصى

‏ابوك منصى في لزوم الرياجيل
‏وانتي لسمحات الغنادير منصى

.....

‏غلبني غرامه واشهد ان المطمة جات
‏جعل ماني بمتردي الحظ والمدبْر

‏نكسني ودحمول الهواجيس راح اشتات
‏مثل صفة القدحان لا حافها العثبْر

‏يقولون يبغى الشوق منك صبر وسكات
‏وانا واحد معاد يسكت ولا يصبْر

.....