اخترنا لكم شعر نبطي وفصيح

‏لا تضرب الاخماس بالاسداس
‏مفروض من كثر التجارب فقت

‏الشخص ينضج مع مرور الناس
‏ماهوب ينضج مع مرور الوقت

.....

‏ذرابة المنطوق ماقلّ و ندر
‏وترى اللسان العايب يسبب حرج

‏بعض الرجال هروجه تزيده قدر
‏وبعض الرجال تقدّره لين يهرج

.....

‏اتثاقل خطوتي للناس وأحزم لك متاعي
‏واستلذ بريبة شعورك وفي صِدقه وزيفه

‏في رجاك اعرف حضوري مثلما اعَرف انقطاعي
‏الحياه بدون ضحكاتك مساريها كِليفه

‏ فيك احس بخفّة احساسي ونفسي واتّساعي
‏معك روحي رغم ثقل الأرض واهلها خفيـفه

.....

‏لا تطري الحب ويضيق المكان الرحيب
‏ولاتسرق اعجابي بطبعك ولا مواخذه

‏أخاف أعشق تفاصيلك واشوفك حبيب
‏واحط قلبي على كفي ولا تاخذه

.....

صوتـك جذبنـي والمعـانـي تنـاديـك
‏يا صاحبي قل لي وش اسباب حبك

‏كـل القصـايـد شفتـهـا بـيـن ايـاديـك
‏سبحـان مـن ســواك ربــي وربك

.....

مبارك_الشهري ... https://vm.tiktok.com/ZSHWnt1DKxxTW-wZDG7

‏حبي يزيد وينقصون المحبين.
‏وقلبي يضم التضحيه والنظافه

‏وللحب ماكل البشر مستحقين
‏وعرفت تبذير المحبه حسافه

.....

‏ما بقى في خارطة صدري لا شعب ولا قيادة
‏يالوحيد اللي جمع ضدّين راحل ومتبقّي

‏أنت حقٍ دونه الرجّال ما يذخر عتاده
‏واعتقد ما جيتك آطالب بشيّ الا بحقي

‏أشهد إن ابوك عقّب غادةٍ من بطن غادة
‏وأشهد إنه يوم نقّاها من الغيد متنقي

‏أحسب ان حظي من عيونك مثل حظ القلادة
‏وين ما لقّيت واجهت السعد يمّي ملقّي

‏واقتنعت إنك قدر ما تردعه قو ارادة
‏لو تواجهني بحد السيف ماني بمتوقي

‏اعتبر كل الضلوع فداك يا ظبي الحمادة
‏أخذ كل اللي تبي تاخذ وبقّ اللي تبقّي

.....

ان عشت ما عاد للحب المبجّل بلاد
‏وان مت قبلي ضحايا العالم الميتين

‏انكرت سلم الهوى شريعةً واعتقاد
‏بعد إرتكاب الغِوايه وإنحراف السنين

‏كيف اتبع ملة العشاق وانا ما عاد
‏امنت بالحب من بعدك مع الاخرين

‏أبائي الاولين معسفيّن الجياد
‏والله ربٌي ورب ابائي الاوليّن

.....

‏أقبل الليل والليلة سناء البدر ضاوي
‏طيب يا خاطري وأقطف ثواني سهرها

‏كيف أوصفّكْ يا وجهٍ بحسنه سماوي
‏وأنت حسنك ملى سمع الحياة وبصرها

‏جادلٍ يوم جات الريح في ثوب غاوي
‏كل ما جت تعرّيها سترها شعرها

‏ضاع عقل الرزين وتاه طرف الحياوي
‏بين لـولـو قلادتها ولـولـو ثغرها

.....