فوق هام السحب ( الشعر الشعبي) على متن القوافي

على طاري الغلا ومعاتب الغالين لـ الغالين
‏إلى شفت الكلام بـ يجرحك ماعاد كملته

‏أداري خاطرك واقدرك من اول وذلحين
‏يا حلمٍ راح نص العمر في رجواه ما طلته

‏لاياخذك الغرور وقولتي لك كل شيٍ زين
‏لو ان اللي حصل ماهو بـ منك ماتحملته

.....

ياضحكة حياتي لا تمرّ الفرص وتفوت
‏طريق الوصل مدري متى نقدر نعبْره

‏ياقوّ الغرام اللي حكمني حكم طاغوت
‏وياشين الغياب وطيحة الحظّ والثَبرة

‏حَدَتنا الظروف القاسية لينْ شفنا الموت
‏وجبرنا الزّمان اللي مانقدر على جبْره

.....

‏أعذريني لا طلبت العذر وارضي يا مليحه
‏واستغلي فرصة أحلامي قبل يمكن صوابي

‏كيف قلبك يخفي المشروه وعيونك صريحه؟
‏المعاتب بالعيون أقسى من طعون الجنابي

‏أقلطي بأسلوبك الطاغي على صدر القريحه
‏واستقري لين تجنين العذوبة من عذابي

.....

عليك سجّات الهوى ترسل مناديب العتاب
‏لين اتوحّى من ورى النسيان صوتك واذكره

‏الدار ما عادت بعدكْ الّا مضارب من خراب
‏هذي منازلها خلت واللي بقى مات اكثره

.....

‏هلا يابسمة الوجه الحزين وخاطر الملتاع
‏هلا يانسمة الليل العليل وضحكة أيامي

‏عرفتك وانتهى عصر الحسافه والتوجد ضاع
‏ولقيتك واقعٍ أجمل مدى من سالف أحلامي

‏أنا وشلون لو أبعد وأقول إن الدروب وساع
‏وأنا مالي سوا دربك عظيم ومصدر إلهامي

.....

بين الكثير مْن التساؤل والقليل مْن اليقين
‏المشكلة ماني بأعرف المشكلة وأحلّها

‏أنا تعبت مْن الوصل والبعد والناس أجمعين
‏وقلوب تبغيني وأنا ما عاد أبيها كـلها

.....

رجف غصن الجريد وصارت ورود الربيع اشواك
‏وبان الفقد في وجه الصبور الثابت الكامي

‏ودريت إنك رحلت وغاب حسّك والقبر مثواك
‏وماتت بسمة الحي العتيق ببارد أنسامي

‏ثبتت بوقفه الشامخ وأنا منهار من فرقاك
‏وتسارع نبض قلبي لين صار النبض بعظامي

.....

‏أصير لِك ناس واجد وأنت وزعهم
‏وأبقى على طول في بالك وفي قلبك

‏أنا أضعَف الناس وأقواهُم وأشجعهم
‏وأنا أكثَر اللي يخاف يحب واحَبك

.....

اي والله اقدّره واقدّر ظروفه
لكنّ مدري متى الايام تجمعنا

الساعة اللي تمر بدون مااشوفه
كنها قصيده طويله مالها معنى

.....

من يزرع المعروف في غير قاعه
يحصد محاصيل الحسايف والأوجاع

.....