اخترنا لكم شعر نبطي وفصيح

يا صاحبي لا تشكي ظروف دنياك
ترى ظروف الناس تشبه ظرووفك

لكن ليا حـدك زمانـك علـى اقصـاك
اسجـد بنــص الليل وارفـع كفوفـك

فـي ذمتــي ما ينفعـك غيـر مـولاك
والا الخــلايق ما تشــوف معــروفك

دنيـاك هـاذي تلتـوي مثـل الاســلاك
مــــرات تـوقفلك ومــرة تطـووفــك

ان قـام حظـك قامــت النـاس ويـاك
وان طاح حظك طحت ماحد يشوفك

.....

‏رد للناس الجمايل ولو ردك قليل
في عيون الناس تبقى على راس الهرم

وكان ما تقدر على الرد لا تنسى الجميل
من جحد أهل المعاريف ما هو محترم

والبخيل اللي اذا احتجته ومالك بديل
لا تعزّه فيك دامه من الطيب انحرم

ما يحز بخاطري غير لا شفت البخيل
ما يسولف عند خلق الله إلا بالكرم

.....

‏انا ليا شانت نفوس الاصحايب
‏وغلب على طيب النوايا رداها

‏اقفيت عنهم مثل ما يقفي الذيب
‏وخليت لعيال الثعالب عشاها

‏ قبل الردا يطري على بالي الطيب
‏ونفسي لغير الله ما علقّ رجاها

.....

‏مظاهر الناس ما هي مثـل خافيها
لا تنخدع وأكثـر الازوال خداعه

أكثر نفوس البشر لو شفت ما فيها
ما عاد تقبل مقابلها ولو ساعه

.....

إنطقي كل الكلام اللي يمرك
خاطرك به كلمتينٍ ماهتفها

حتى بعتابك غنَج، لله درك!
كل عبره صوتك الليّن خطفها

من سماك، إلين نوصل حد بَرّك
بينهم غلطه لي سنين أقترفها

ضاع عمري بين تفاحك وسرك
جنةٍ، يغني عن الدنيا ترفها

والنسيم أن لاعب عتامك يبرك
والنجوم اللي تضيّح مكتشفها

لي شعورٍ لا لمح عينك تحرّك
دوريني بين الأهداب وطرفها

ما أذكر أول صبح به خيرك وشرّك
أذكر آخر ليلة الحزن إنتصفها

مايمر من السراب إلا صورك
لـ السحاب اللي دموعه ماذرفها

لو يموت الشوق، والفرقى تغرّك
والقلوب برودها يجرح شغفها

إذكريني .. كل ماينفكّ .. زِرّك
الفتن مايستريح اللي كشفها

وإسلكي كل الدروب اللي تجرّك
السكك ماتامن إلا اللي عرفها

وإعرفي وش ينفع، ووشهو يضرّك
الحياه ظروفها تذبح صدفها

وأبشري باللي يراضيك ويسرّك
لي خفوق أن غنوّا الفرقى عزفها

.....

‏أغلب رفوف الكتب ما حرَّكت ساكن
‏كثر ما حرَّك شعور القلب مسودّة

‏مثل الهوامش وأمان شْعوري الراكن
‏يدرى إختلاس العيون العابرة ودّه

‏وش أنتظر له لطيف أن مرَّ الأماكن
‏صدري يجرّ النسم كنّ النسم نِدّه

‏ قرَّبت منّه قميصي ليلة ولكن
‏لا من دُبر قدَّه ولا من قُدم قدَّه

.....

ثلاث سنين من ظهري ولا كففت سهاد
تخالط ساكني ثوره وتغلب عتمتي ضوحي

ثلاث سنين أو أكثر أحنّ ولا عرفت أعتاد
هنا ماني بأنا حتى جروحي ما هي جروحي

رفيق الذاكره كل الطواري ترتهنك بلاد
رفيق البال ما أظنك تحن وأنت ما توحي

تعبت ألمحك في صدع المرايا وأرقب الميعاد
وألملم ناثر الذكرى لعلّ تشوفني روحي

حصادي يوم وسنيني جراد وبالمحان جْياد
تدك الصدر لامنّي سليت وتصهل بلوحي

.....

‏في ظلام الليل يارب المشارق
‏من يزيل الدمع من وجه المدينه

‏الرسايل آخر آمال المفارق
‏لا أنتهت كل الوسايل من يدينه

.....

فقدتك والضياع اللي بعد فقدك ماهو بيديّ
أنا في غبّة وداعك وضايع في مراثيها

توحشتّك وأحس أن الأراضي تنطوي بي طيّ
عليك من الرحابه كثر ما صرت أختنق فيها

.....

‏لو نسى وجه الفجر صبحٍ يصبّر ساهرينه
‏ ما نسيتك يا اوَّل أحبّك نطق فيها لساني

.....