اخترنا لكم شعر نبطي وفصيح

ملتني احوالي كثر ماني احتجت
من عاهر ظروفي شويّة كرامه

تلجمني الحاجه ليا قمت واسرجت
ظني على رجلٍ خذلني كلامه

وتذبحني العزه ليا رحت واحرجت
نفسي مع اللي ما يذري مقامه

تعتب اوآسيني على كذبة ابهجت
وجه الزمان اللي لحقني ملامه

ياوقت تكفى بس يكفى ترى ازعجت
جيبٍ ملته قروش جرحي ندامه

موحش عويل الليل لامن تهودجت
السرمدي منه ليا اقبل عسامه

.....

لا تبروز اعذارك على وجهك أن جيت
دام الخطايا ترسم اكثر ملامحك

لو هي على قلبي مسامح لو أخطيت
المشكله عيّت جروحي تسامحك

.....

الصراحة لو تقول الناس راحه
في زمان اليوم ما صارت مريحه

كم صريحٍ عرقلو سكة نجاحه
كل ذنْبه دايم أقوال صريحه

والصراحه دامها صارت فضاحه
إحفرو لموضح الكلمه ضريحه

.....

أرسمي لي لوحة الوهم الكبير
وإمزجي لون الكواكب بالسحَر

وأرسمي شئٍ يصير وما يصير
قصر لؤالؤ نورشمعة بالبحر

وشعر عذرى يرتهش مثل الحرير
وشامةٍ تسمر تحت نور النحر

وعين ترقب عودة الخل الاسير
ودم عاشق طال صبره وأنتحر

ووردةٍ ذبلت على جال القدير
وطائرٍ حاول يرفرف وأندحر

.....

كالنخلة اللي فاقدٍ جذعها الري
رُغم العطش ما تنحني في سهولة

بأخر رمق تمتص من جذرها ألمي
وتبقا تقاوم دون أدني ميولة

يبقا على مر الزمن غصنها حي
وشموخها الأخّاذ يفرض مثولة

وكل ما احترق من غصنها اليابس الني
تعطي ثمرها بأكتماله وحولة

وأنتِ كذلك رغم تصديدك السي
يا كاسبة بالحسن كاس البطولة

.....

اشتاق لك لو غيبتك بالثواني
وشلون لو انها دقايق وساعات

جريت لك صوتي لحون واغاني
نقيت لك من ذوقنا عدت ابيات

انت الوحيد اللي تنير المكاني
في روحتك ذوقتني منك مأسات

اشقيتني وصبرت وصبري كواني
امرضتني يادواي ولابه سلامات

.....

‏لا تنزعج من جفاي و طبعي الشارد
أنا اكثر إنسان يمشي عكس رغباته

.....

الا يالزمان المقبل إقبل علي بزين
أنا سايلك بالله لا تلحق على الباقي

أنا من قبل يومين وأكثر إلين الحين
لا عينّت لي مخرج ولا زانت أخلاقي

غدا كل شيء فالعين ما عاد يملا عين
ولا عاد والله عندي في لحية أرزاقي

أدوّر شتات أوراق ضاعت قبل عامين
وأنا يالله ألقاني قبل أدور أوراقي

خريطة حياتي وقفتني على سيدين
تحيّرت كن القيد فيدي وفي ساقي

أنا عارف أن الصمت إبن سته وستين
ما أعده من أعدائي ولا ضمن عشاقي

لكن حالفٍ بالله ثلاث وقطعت يْمين
ما أعوّد على دربٍ نثر صافي أحداقي

أنا ما معي وجهين ولا ألعب على الحبلين
واذا جيت أعاتب شخص أعاتبه بفراقي

أغيب بهداوّه لين حتى الامور تزين
مع كامل الحب ومع خالص أشواقي

اذا الله كتب نرجع سوا زينٍ على زين
واذا عادك بتبقى كذا كمّل الباقي

.....

الغالي الي لا فارقني غديت اثنين
وان جاني اصير واحد لا شعوريا

وان شانت اخلاقه ، اخلاقي علي تشين
وارتاح نفسيا اذا ارتاح نفسيا

مشكلتي لاغليت شخص اطيح بين امرين
بين ابتعد منه ولا ازعجه يوميا

من زود ما اغليه ودي لو معي قلبين
اخاف قلبي يجي مختل قلبيا

.....

تغلا على كيفك مدامك غلا مغليك
يا محلا الغلا ياللي تغلا ويا مروعك

أحب الحياة اللي تضمك وبين يديك
أشوف الحياة اللي تضمك ولا توسعك

لأنك قمر أقول سبحان من يخفيك
شبيه القمر في كل مطلع شهر مطلعك

تحب المطر وأنت المطر ينزل يحاكيك
وتحب العطر وأنت العطر منك ومنبعك

تحب الغلا وأنت تغلا على غاليك
وأنا ودي أودع حياتي ولا اودعك

تكبرت ياللي مكبرك في عيوني ذيك
وأنا اللي نثرت لك القصايد عشان اجمعك

تغيب تعرف أني بعاني عشان اجيك
وتسترجع الذكرى وأنا اعرف وش رجعك

تعرف أني احبك محبه بلا تشكيك
ولو انك توزع للفقارى بوزعك

لا تزعل ولا يأخذك مني الزعل ،ابيك
تعرف أني اكثر شخص لو توجعه ما اوجعك

أنا احاول أني بقدر الإمكان ما اخليك
ولو يخدعك وقتك أنا مستحيل اخدعك

افكر وأنا ما ودي افكر الا فيك
وأسافر وأنا ماودي اسافر الا معك

.....