فوق هام السحب ( الشعر الشعبي) على متن القوافي

‏بعض المشاعر تحرق القلب والروح
وبعض المشاعر تسعدك في حياتك

وبعض المشاعر من فؤادي لها فوح
تســري تناجـي يا حيــاتـي غلاتـك

ما بين صمت المكابر واختناق الحنين
متوهم القلب فيهم والضحيه انا

المشكله ما يصـد الا محسوب وثمين
والنفس عن ما يصد اليوم فيها غنا

.....

ودك تحب اللي ليا زعل ترضيه
‏ولا تحب اللي على طول راضي

مزيد الوسمي

ياعنّها ماجت حياتي لو أقفيت
وش ينفع المجداف عقب السفينه

ياللي تتم اليوم عامك من أخطيت
وأنكرت من شالك بقلبه وعينه

إن كثرت البيبان لاتامن البيت
وأذكر ترى بعض الأغاني حزينه

ياشمع بلغ وردتي كم تمنيت
إن الشوارع تفهم أهل المدينه

واني غريب وكل ماقلت حنيت
تعلقت في رجل الإحساس طينه

حبيبتي والله مارضى زعلها
لكن خطاها علني كثر ماصار

والبارحه مأمل أنا من غزلها
واليوم انا للبعد شاري ومختار

ومن حب نجد يحب مع نجد ألها
والا ترى ماله حشيمه ومقدار

.....

قالت إفرض طيب إن الشمس نامت من تعبها
من تظن يفك أزارير المسا ويصب نور

قلت أبد لا تشغلين عيونك إلا في هدبها
واعصري ظلك تسيل شموس وتجف البدور

ياحياتي والمشاعر هي " الم شاعر" كتبها
والغلا هو " الغلا " وأعذر حبيبك لو يجور

ولو رصعت الشمس روبي وأكتسا اللولو لهبها
أختفت مع لمعة ظلالك بقيعان البحور

وغرتك لا هفهفت حتى الهوى لا ماقضبها
ودايم تفرّك يدين اللي يصافحك العطور

وماسبقك أحد ٍ تجلل بالسحايب واعتصبها
ولاعرق حي ٍ دهن ورد وزفر غيرك بخور

آه يا أحلى ذنوب العاشق اللي مأرتكبها
الغرور يصيب غيرك وانت من صاب الغرور

شفت دورة هالكواكب حول شمس ٍ تجتذبها
كنها قلوب الأوادم حولك تحور وتدور

نفسي ادري من سبقني للمواعيد وشربها
او من اللي بس عبا دمي إحساس وشعور

ياحبيبي قد سمعت بنار قد حنت حطبها
أو بمن يشهد على نفسه لخصمه يوم زور

طالبك لاتنشد دموعي حبيبي عن سببها
واعذر القلب الحزين وانت بالحيل معذور

قالت افرض طيب ان الشمس قلت يوم ادبها
قلت انزلها بقذلة صبحها وأكتبك نور

.....

حبيبتي ماني حزين وشقاوي
لكن غدت ضحكاتي لفمي عقوق

حبيبتي والشوق ماله عراوي
ولا لطير العشق برقع ولا سبوق

حبيبتي وإن شفتي الحزن خاوي
فأنا خنقني البعد والبعد مخنوق

حبيبتي ماعاد فيها هقاوي
بيّن بياض الياس والصبر مشقوق

وإلا الهبايب لو تحنّ الخطاوي
ماكان أبد عاشق نسا وصل معشوق

.....

رغبت القصيدة رغبة الطير للتحليق
سماي اصبعين وبينها جرح مسباقي

تعودت اموت بصدق وارحل بلا تعليق
كفاني احس بلذة الموت في اوراقي

ولا احط نفسي وثن يشرب التصفيق
على شان يدخل برزخ النور لأعماقي

.....

الوفاء طبعك وأنا طبعي وفي
ما أخون اللي على قلبي يمون

وإن طرق بالقلب هاجوسٍ خفـــــي
وسط قلبـــي نبض مايرضى يخون

.....

‏أعـطرك مـن فيـض شعري واغنيك
وانسـى مع شوفتك باقي همومــي

وامد لك فنجال عــشقـي واخليك
تصرخ بعال الصوت ضاعت علومـي

.....