ياذا القمر قامت تغير مساريك

ياذا القمر قامت تغير مساريك
يا بطي مطلاعك وياسرع مسراك

طفت النجوم اللي من اول تبارك
ما شفت نجماً بان قبلك وخاواك

قبل امس اعد الك الليالي وراعيك
واليوم عني نازح البعد خفاك

يانجد جعل مروح الغيث يسقيك
يعل ريانك ويسقي ضماياك

يا نجد قلبي ينفعه يوم يطريك
الله يلوم اللي يلومه اللي اطراك

تو ما دريت انه يعزك ويغليك
قلباً تغذى من طعامك ومن ماك

العين في سود الليالي تناجيك
لو هي بلندن كنها اليوم بحماك

يانجد حبيناك من حب راعيك
اللي بناء مجدك وصانك وسواك

الامن والايمان مستوطناً فيك
فضل المليك اللي رضاء فيك ورضاك

كلام مشتاقً يبي شوف اراضيك
جنسيته تحمل فصيلة رعاياك

مهو كلام مخادعً دايم يسميك
باسماء تنافى مع حلاياك وسماك

بالشر يدعيلك وبالخير ناسيك
ما يدري ان اهلك تسلا بذكراك

لبيك يا داري من البعد لبيك
صرخة غريباً ما يصبر بلياك

خلف بن هذال